10.12.2025 | 23:29
ԱՄՆ Կոնգրես է ներկայացվել 907 ուղղումն ամբողջությամբ չեղյալ համարելու մասին օրինագիծ
Արամ Վարդանյանից (Վստրեչի Ապեր) հօգուտ ՀՀ-ի բռնագանձել 10 բնակարան, բնակելի տներ, խանութ, շինություններ, 4 հողամաս. դատարանին պահանջ է ներկայացվել
Հասարակություն
14.02.2022 | 12:15
2022 թվականի հունվարի 20-ին Երևան քաղաքի առաջին ատյանի ընդհանուր իրավասության դատարան է ներկայացվել ապօրինի ծագում ունեցող գույքի բռնագանձման վերաբերյալ չորրորդ հայցադիմումը, որն ընդունվել է վարույթ: Այս մասին տեղեկացնում է Գլխավոր դատախազությունը։
ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունը պահանջ է ներկայացրել դատարանին Արամ Վարդանյանից, որ ավելի հայտնի է Վստրեչի Ապեր մականվամբ,, նրա հետ փոխկապակցված 2 անձանցից հօգուտ Հայաստանի Հանրապետության բռնագանձել մասնավորապես՝
Երևան քաղաքում գտնվող 10 բնակարանները, բնակելի տները, խանութը, շինությունները, Կոտայքի և Տավուշի մարզերում գտնվող 4 հողամասերը, 2 տրանսպորտային միջոցները, իսկ անհնարինության դեպքում՝ դրանց միջին շուկայական արժեքը, որն ընդհանուր կազմում է 870.997.100 ՀՀ դրամ,
260.298.106 ՀՀ դրամ՝ որպես ապօրինի դրամական միջոցների մնացորդ,
472.097.316 ՀՀ դրամ, որը չի հիմնավորվում անձի օրինական եկամուտներով, ունի ապօրինի ծագում և հնարավոր չէ բռնագանձել՝ հիմք ընդունելով ապօրինի ծագում ունեցող գույքի բռնագանձման մասին օրենքի 20-րդ հոդվածի 4-րդ մասը:
Առաջիկայում վարչության կողմից այլ գործերով, որոնցով արդեն իսկ կիրառվել են հայցի նախնական ապահովման միջոցներ, ևս կներկայացվեն ապօրինի գույքի բռնագանձման հայցադիմումներ։
Հիշեցնենք՝ քրեական հեղինակություն համարվող Արամ Վարդանյանին մեղադրանք է առաջադրվել 2020 թվականի հուլիսին։ Նա մեղադրվում է քաղաքացիական կացության ակտերի գրանցման մարմիններին սուտ տեղեկություններ հաղորդելու, փաստաթղթեր կեղծելու, շորթման և փողերի լվացման համար։ Վարդանյանը սկզբից կալանավորվել, ապա 2 միլիոն դրամ գրավի դիմաց ազատ է արձակվել։ Այս պահին նրա մասով դատական գործն անցնում է դռնփակ։
Ռոզա Վարդանյան
