24.11.2024 | 18:04
Թբիլիսիում կանայք երթ են անցկացնում․ պահանջում են Բիձինա Իվանիշվիլիի հրաժարականը
Մակրոնը ժամանում է Մոսկվա․ Բայդենը զանգահարել է նրան
Քաղաքականություն
07.02.2022 | 11:16
Ֆրանսիայի նախագահ Էմանուել Մակրոնն այսօր կմեկնի Մոսկվա․ դա կլինի վերջին ժամանակներում արևմտաեվրոպական խոշոր երկրի ղեկավարի առաջին այցը ՌԴ մայրաքաղաք։ Ֆրանսիայի նախագահը բանակցություններ է վարելու Վլադիմիր Պուտինի հետ․նա մտադիր է քննարկել առաջին հերթին Ուկրաինայի շուրջ ստեղծված ճգնաժամը, գրում է BBC-ի ռուսական ծառայությունը։
Պուտինի հետ հանդիպման նախօրեին՝ կիրակի օրը, Մակրոնը հեռախոսազրույց է ունեցել ԱՄՆ նախագահ Ջո Բայդենի հետ։ Ըստ Սպիտակ տան՝ «առաջնորդները քննարկել են դիվանագիտության և զսպման վերջին քայլերը՝ ի պատասխան Ուկրաինայի սահմաններին ռուսական ռազմական ուժի շարունակական կուտակման և վերահաստատել են իրենց աջակցությունը Ուկրաինայի ինքնիշխանությանն ու տարածքային ամբողջականությանը»։
Ինքը՝ Մակրոնը, խոսել է իր այցի նպատակի մասին Journal du Dimanche ֆրանսիական պարբերականին տված հարցազրույցում։ Նրա կարծիքով, Արևմուտքը կարող է գործարք կնքել Մոսկվայի հետ, որը կկանխի ռազմական հակամարտությունը։ Ֆրանսիայի նախագահը նշել է, որ Ռուսաստանի գործողություններն ուղղված են «ոչ թե Ուկրաինային, այլ ՆԱՏՕ-ի և ԵՄ-ի հետ կանոնների հստակեցմանը»։
«Մենք պետք է պաշտպանենք մեր եվրոպացի եղբայրներին՝ առաջարկելով նոր հավասարակշռություն, որը կպահպանի նրանց ինքնիշխանությունն ու խաղաղությունը», – ասել է Մակրոնը: «Դա պետք է արվի Ռուսաստանի հանդեպ հարգանքով և այս մեծ ազգի և մեծ երկրի ժամանակակից տրավմաների ըմբռնմամբ»,- նշել է Ֆրանսիայի նախագահը:
Տաթև Ֆռանգյան
