Ալիևը հայտարարում է, որ մինչև ամառ առաջին ադրբեջանցիները կվերադառնան Կովսական․ փաստերը հակառակն են ապացուցում

Ադրբեջանի նախագահ Իլհամ Ալիևը Բաքվում կայացած Երիտասարդական ֆորումի ընթացքում հայտարարել է, որ գարնանը կամ ամռանը «առաջին ադրբեջանցիները վերադառնալու են Ղարաբաղ»՝ գրավյալ Կովսականի վերակառուցված Աղալի գյուղ։ 

«Այս տարի ծրագրված նախագծերից ուզում եմ նշել Աղալի գյուղի շինարարության ավարտը։ Դա պիլոտային ծրագիր է, որն ունի մեծ խորհրդանշանական նշանակություն, քանի նախկին տեղահանվածները կվերադառնան հայրենի հող այս տարի։ Ստացվում է, որ պատերազմից չի անցել երկու տարի, և մենք գարնանը կամամռանը ցանկանում ենք այնտեղ տեղափոխել Աղալի գյուղի բնակիչներին»,- ասել Ալիևը։ 

Օրերս էլ Ադրբեջանի գյուղատնտեսության նախարարի տեղակալ Իլհամա Գադիմովան հայտարարել էր, թե Աղալի «խելացի գյուղի» շինարարությունն ավարտվում է։ 

Նշենք, որ Իլհամ Ալիևի հայտարարած վերադարձը չի սկսվում, քանի որ գյուղի շինարարությունը մոտ չէ ավարտին, ինչպես ներկայացնում են ադրբեջանցի պաշտոնյաներն ու պետական քարոզչամեքենան։ 

Ի դեպ, դեռևս 2021թ․ հուլիսին Ադրբեջանի ԱԳ փոխնախարար Էլնուր Մամեդովը հայտարարել էր, որ 2022 թվականի հունվարին Կովսականի «խելացի գյուղը» պատրաստ է լինելու։ Ինչպես տեսնում ենք՝ այս հայտարարությունը նույնպես իրականություն չի դարձել, և ադրբեջանցիների բնակեցման մասին տեղեկություններ չկան։ 

Այն, որ ծրագրի իրականացման հետ կապված խնդիրներ կան, պարզ էր դարձել դեկտեմբերին շինարարությունում աշխատող բանվորների բողոքների արդյունքում։ Նրանք բողոքում էին աշխատավարձերի չվճարումից։ Աշխատողները պատմել էին, որ խաբված են AS Group Investment-ի վարձած թուրքական ենթակապալառուի կողմից։ Սկանդալի մասին հրապարակումներից հետո աշխատողները ստացել էին իրենց աշխատավարձերն ու Ամանորի տոներից հետո հրաժարվել վերադառնալ Կովսական։ 

Իհարկե, տեղի ունեցող խնդիրների մասին Ադրբեջանի իշխանությունները լռում են։ Պետական լրատվամիջոցերն էլ լուսանկարներ ու տեսանյութեր են հրապարակում, որ շինաշխատանքները շարունակվում են։ 

Ավելի վաղ էլ ադրբեջանական «Թուրան» գործակալությունը գրել էր, որ առաջին փուլում 1400 մարդու համար նախատեսված գյուղը չի կարող կառուցվել 6 մասնավոր վիլլայի գնով։ Լրատվամիջոցը նշել էր, որ նոյեմբերի 11-ին «Ազերթաջ» պետական ​​գործակալության կայքում հրապարակված մոտ 30 լուսանկարներում պատկերված չեն եղել ոչ միայն 200 բնակելի շենքեր, անգամ 50 տներով լուսանկարներ։ Երկրի Հանրային հեռուստաընկերության տեսաֆիլմում էլ չկա մի կադր, որում երևա կառուցված առնվազն 100 տուն։

Շինարարներից Սահավյատ Իսմայիլովը, որն աշխատել է Կովսականում ու աշխատանքից ազատվել աշխատանքային օրենսդրության խախտման պատճառով, լրատվամիջոցին պատմել է, որ առաջիկայում չի կարող գյուղը շահագործման հանձնվել։

«Աշխատանքների վաղաժամկետ ավարտի մասին խոսք լինել չի կարող, լավագույն դեպքում՝ պետությանն ամեն ինչ կհանձվի 7-8 ամսից»,- ասել էր Իսմայիլովը։

Էմմա Չոբանյան