11.12.2025 | 14:20
Ուկրաինան առաջին անգամ ԱԹՍ-ով հարվածել է Կասպից ծովում ռուսական նավթային հարթակին
Ձմեռային օլիմպիական խաղեր՝ առանց ձյան․ այսօր մեկնարկում է Պեկին 2022-ը
Քաղաքականություն
04.02.2022 | 12:55
Պեկինում այսօր պաշտոնապես մեկնարկում են Ձմեռային օլիմպիական խաղերը, սակայն մրցումները սկսվել էին դեռևս փետրվարի 2-ին, հաղորդում է RBC-ն։
Պեկինը դարձել է պատմության մեջ առաջին քաղաքը, որն ընդունել է ինչպես ամառային, այնպես էլ ձմեռային Օլիմպիական խաղերը՝ ընդամենը 14 տարվա տարբերությամբ․ ոչ մի քաղաք այսքան կարճ ժամանակում չի ընդունել երկու օլիմպիական խաղեր: 1980 թվականից ի վեր միայն ԱՄՆ-ն է ընդունել երկու Օլիմպիադա ավելի կարճ ժամանակահատվածում (1980, 1984, 1996 և 2002 թվականներին):
Ձմեռային օլիմպիական խաղերի թալիսման են դարձել պանդա Բին Դուն Դունը և չինական լապտեր Սյուէ Ժուն Ժուն։
✨This video will brighten your mood! 🎉Let's celebrate the #Olympics spirit and vibe with #BingDwenDwen and #ShueyRhonRhon! 🐼🏮✈Our #Beijing2022 journey is about to start! pic.twitter.com/4IdLFwSwVE
— Beijing 2022 (@Beijing2022) February 2, 2022
2022 թվականի Օլիմպիական խաղերի բյուջեն կազմել է 3,9 միլիարդ դոլար, ինչն այն դարձնում է վերջին երկու տասնամյակի ընթացքում ամենատնտեսողը, սակայն, ըստ որոշ հաշվարկների, գործնականում խաղերի նախապատրաստման ծախսերը շուրջ 10 անգամ գերազանցել են պաշտոնապես ներկայացված թվերը։ Սա հաշվի առնելով՝ 2022 թվականի Օլիմպիական խաղերը կներառվեն ամենաթանկ խաղերի եռյակում՝ Սոչի-2014-ից և Պեկին-2008-ից հետո։
Համաճարակի պատճառով բոլոր օլիմպիական միջոցառումները կանցկացվեն գործնականում առանց հանդիսականների։ Կազմկոմիտեն փակել է տոմսերի վաճառքը։ Հաղորդվել է, որ միայն «ընտրյալները» կկարողանան ներկա գտնվել 2022 թվականի Օլիմպիադայի միջոցառումներին։
Համաճարակի պատճառով մարզիկներն ապրում են, այսպես կոչված, «պղպջակների» մեջ, որը բացառում է Օլիմպիադայի մասնակիցների և արտաքին աշխարհի շփումը։ Հունվարի 23-ից, երբ սկսեցին գալ խաղերի առաջին մասնակիցները, գրանցվել է վարակման շուրջ 300 դեպք, որից 100-ից ավելին հայտնաբերվել է մարզիկների և թիմերի ներկայացուցիչների շրջանում, բայց ոչ ոք հոսպիտալացման կարիք չի ունեցել։
Պեկինի Օլիմպիական խաղերը պատմության մեջ առաջինն են լինելու, որոնք գրեթե ամբողջությամբ հիմնված կլինեն արհեստական ձյան վրա, քանի որ տարածաշրջանում բնական ձյունը շատ քիչ է: Կազմակերպիչները հայտնել են, որ միայն Յանկինգի լեռնադահուկային կենտրոնի համար կպահանջվի 1,2 մլն խ․մ․ արհեստական ձյուն։ Ի դեպ՝ Սոչիի Օլիմպիական խաղերը ևս 80%-ով հիմնվել են արհեստական ձյան վրա։
Ձյան արտադրության համար Պեկինը սարքավորումներ է գնել իտալական TechnoAlpin ընկերությունից, որը գործարկվել է 2021 թվականի նոյեմբերին։ Կազմակերպիչներին անհրաժեշտ քանակությամբ ձյուն առաջացնելու համար կպահանջվի մոտ 223 մլն լիտր ջուր, ինչը հարուցել է բնապահպանների և փորձագետների քննադատությունը (հաշվի առնելով, որ Խաղերի տարածաշրջանը տառապում է քաղցրահամ ջրի պակասից, իսկ արհեստական ձյունը լրացուցիչ վնասվածքների վտանգ է ստեղծում մարզիկների համար՝ վայր ընկնելու դեպքում):
Հավելենք, որ Չինաստանի մայրաքաղաք Պեկինում կայանալիք 24-րդ Ձմեռային օլիմպիական խաղերում Հայաստանը պետք է ունենար 6 ներկայացուցիչ: Սակայն Հայաստանի օլիմպիական հավաքականի անդամներից մեկի և պատվիրակության անդամների մոտ կորոնավիրուսի թեստի պատասխանը դրական է եղել:
Այժմ Հայաստանի հավաքականի անդամները՝ դահուկորդ Միքայել Միքայելյանը, Կատյա Գալստյանը և Անգելինա Մուրադյանը, Պեկինում են: Այնտեղ են նաև մարզիչներ Արթուր Միքայելյանը, Ալլա Միքայելյանը: Պատվիրակության ղեկավարը ՀԱՕԿ-ից Արմեն Գրիգորյանն է:
Տաթև Ֆռանգյան
