Պետք է հավաստիանանք՝ քաղաքացին ուներ ստորագրահավաքին միանալու իրավունք, թե՝ ոչ․ԿԸՀ նախագահի տեղակալ․ ՏԵՍԱՆՅՈՒԹ

Այսօր «Ժողովրդավարական ուժերի հարթակ»-ը ԵՄ-ին Հայաստանի անդամակցության հանրաքվեի օրենսդրական նախաձեռնության վերաբերյալ հավաքված շուրջ 60 000 ստորագրությունները ներկայացրեց Կենտրոնական ընտրական հանձնաժողով։

ԿԸՀ նախագահի տեղակալ Նունե Հովհաննիսյանը Factor TV-ի հետ զրույցում տեղեկացրեց, որ պետք է ստորագրությունների նույնականացում տեղի ունենա։

«Պետք է հավաստիանանք՝ քաղաքացին ունե՞ր ստորագրահավաքին միանալու իրավունք, թե՞՝ ոչ։ «Հանրաքվեի մասին» օրենքը պահանջում է, որ քաղաքացին ստորագրելու պահին ստորագրահավաքին մասնակցելու իրավուք ունենա։ Քաղաքացու ստորագրությունը հանվում է ցանկից, եթե ինչ-որ տվյալներ թերի են լրացված։ Եթե առկա է կրկնություն, ապա միայն մեկն է հաշվարկվում»,- մանրամասնեց ԿԸՀ նախագահի տեղեկալը։

Նշենք, որ «Ժողովրդավարական ուժերի հարթակ»-ը ԵՄ-ին Հայաստանի անդամակցության հանրաքվեի վերաբերյալ սեպտեմբերի 16-ից մինչև նոյեմբերի 14-ը ստորագրահավաք էր նախաձեռնել։ Համաձայն ՀՀ Սահմանադրության, հարցը Ազգային ժողովի օրակարգ մտցնելու համար անհրաժեշտ էր 60 օրվա ընթացքում հավաքել ՀՀ 50 հազար քաղաքացու ստորագրություն։ Նախաձեռնությանը, փաստորեն, հաջողվել է ավելի կարճ ժամկետում հավաքել շուրջ 60 հազար ստորագրություն։ Եթե օրինագծին ԱԺ-ն հավանություն չտա, Եվրաքվեի նախաձեռնության հեղինակները պետք է կարողանան 300 հազար ստորագրություն հավաքել, այդ դեպքում հանրաքվեն տեղի կունենա իրավունքի ուժով։

Հիշեցնենք, որ հունիսի 21-ին ժողովրդավարական ուժերի նախաձեռնությամբ ԵՄ-ին Հայաստանի անդամակցելու հարցով հանրաքվե անցկացնելու հարցով նաև տեղի են ունեցել խորհրդարանական լսումներ։

Վարչապետ Նիկոլ Փաշինյանն էլ «Ժողովրդավարության հայկական ֆորում»-ի ժամանակ ասել էր, որ Եվրամիությանն անդամակցելու հարցով հանրաքվե անցկացնելու անհրաժեշտություն չի տեսնում, քանի որ «գիտի ժողովրդի կարծիքը»։

Մանրամասները՝ տեսանյութում։