Բաքուն հրաժարվում է դելիմիտացիայից․ Բայրամովը հայտարարել է, թե «Հայաստանն իրավունք չունի որևէ պայման դնել այդ գործընթացի մեկնարկի համար»

Ադրբեջանի ԱԳ նախարար Ջեյհուն Բայրամովը հերթական անգամ հաստատել է, որ պաշտոնական Բաքուն ամեն կերպ խոչընդոտելու է Հայաստանի հետ սահմանների դելիմիտացիայի գործընթացին։ Մասնավորապես, այսօր Հունգարիայի ԱԳ նախարարի հետ համատեղ մամուլի ասուլիսում Բայրամովը հայտարարել է, որ Հայաստանի «չունի ո՛չ բարոյական, ո՛չ էլ իրավական իրավունք՝ սահմանների դելիմիտացիայի գործընթացի մեկնարկի համար որևէ պայման դնելու»։

Բայրամովն ասել է, թե ադրբեջանական կողմը չի տեսնում հետևողական մոտեցում համատեղ երկկողմ հանձնաժողովի ստեղծման հարցում՝ Հայաստանի հետ սահմանի դելիմիտացիայի գործընթացի մեկնարկի համար։

Ադրբեջանցի պաշտոնյան հաստատել է, որ վերջերս Հայաստանն իր առաջարկները Ռուսաստանի միջոցով ուղարկել է Ադրբեջանին։

«Դրվել են որոշակի նախապայմաններ։ Ադրբեջանական կողմը կարճ ժամանակում ներկայացրել է իր դիրքորոշումը։ Հայտարարվել է, որ մենք կարող ենք սկսել այդ գործընթացը՝ առանց որևէ նախապայմանի։ Պետությունը, որը 30 տարի տարածքներ է «օկուպացրել», բարոյական, իրավական կամ քաղաքական իրավունք չունի սահմանազատման գործընթացի համար որևէ պայման առաջադրելու։ Հուսով ենք, որ հայկական կողմը դա արագ կհասկանա։ Դա օգտակար կլինի տարածաշրջանի համար»,- ասել է Բայրամովը։

Հիշեցնենք՝ ՀՀ ԱԳ նախարար Արարատ Միրզոյանը հայտարարել էր, որ Բաքուն բացասական է արձագանքել սահմանի դելիմիտացիայի ու դեմարկացիայի մասին Հայաստանի առաջարկներին։
Ստացվում է, որ Ադրբեջանն իրականում չի ցանկանում կատարել արդեն իսկ ձեռք բերված պայմանավորվածությունները՝ հրաժարվելով իր զորքերը դուրս բերել ՀՀ սուվերեն տարածքից, որտեղ ադրբեջանցիները գտնվում են 2021թ․ մայիսի 12-ից։

Նշենք, որ այդ պայմանավորվածությունները ձեռք էին բերվել անցյալ տարվա նոյեմբերի 26-ի Սոչիի և դեկտեմբերի 14-ի Բրյուսելի հանդիպումներում։ Մասնավորապես, զորքերի հետքաշման մասին ասվում է ԵՄ Խորհրդի նախագահ Շառլ Միշելի միջնորդությամբ Հայաստանի և Ադրբեջանի ղեկավարների եռակողմ հանդիպման արդյունքներով հրապարակված եվրոպական կողմի հայտարարության մեջ։

Էմմա Չոբանյան