09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
«Մենք երբեք և ոչ մի պարագայում չենք ծնկելու ոսոխի առաջ»․ ՀՀ ԶՈՒ 30-ամյակի տոնը Գյումրիում
Հասարակություն
28.01.2022 | 14:59
ՀՀ ԶՈՒ կազմավորման 30-ամյակին նվիրված տոնակատարությունները Գյումրիում սկսվեցին «Շիրակ» գերեզմանատուն այցելելությամբ, որտեղ ամփոփված են 44 օրյա պատերազմի 81 նահատակների մարմինները։
«Ազատամարտիկների պանթեոն»-ում Շիրակի մարզպետը, փոխմարզպետները, Գյումրու քաղաքապետը, փոխքաղաքապետերը, ուժային կառույցների ղեկավարները, զինվորականները, ԵԿՄ ներկայացուցիչները, հոգևորականները հարգանքի տուրք մատուցեցին Արցախյան առաջին, քառօրյա և 44-օրյա պատերազմների հերոսների հիշատակին խնկարկեցին ու ծաղիկներ դրեցին նրանց շիրիմներին։ Կատարվեց նաև հոգեհանգստի կարգ, հնչեցին աղոթքներ։
Շիրակի մարզպետ Նազելի Բաղդասարյանը լրագրողների հետ զրույցում ասաց, որ անկախ անդառնալի կորուստներից՝ Հայոց բանակը հաղթական է, ոսոխի առջև ծնկի իջնող չկա։
«Օրվա խորհրդով միջոցառումների մեկնարկը տվել ենք պանթեոնից՝ հարգանքի տուրք մատուցելով մեր նահատակներին՝ Արցախյան առաջին պատերազմի, քառօրյա և 44-օրյա պատերազմների հերոսներին։ Այդ ամենի գիտակցումով ու խոնարհումով մենք պետք է արձանագրենք, որ այսօր տոն է, Հայոց փառապանծ բանակի տոնն է և յուրաքանչյուր հայ իր սրտում պետք է տանի մեկ կարևոր պատգամ, որ մենք անկոտրում ենք, որ տոկուն ենք, որ աննկուն ենք և հայոց բանակը հաղթական է՝ անկախ վայրիվերումներից, անկախ մեր անդառնալի կորուստներից։ Մենք երբեք և ոչ մի պարագայում չենք ծնկելու ոսոխի առաջ, մենք արի ու ու քաջ ենք լինելու։ Փառք մեր հայոց բանակին»,- ասաց Շիրակի մարզպետը։
Արմիկ Մովսիսյան
