08.12.2025 | 11:21
Գոլային փոխանցում կատարած Սպերցյանը՝ խաղի լավագույն ֆուտբոլիստ․ ՏԵՍԱՆՅՈՒԹ
ՔՈՎԻԴ-19. Կրթությանը հասցված վնասի ծավալները «գրեթե անհաղթահարելի են». ՅՈՒՆԻՍԵՖ
Հասարակություն
24.01.2022 | 17:32
Ավելի քան 635 միլիոն սովորող դեռևս տուժում է դպրոցների լրիվ կամ մասնակի փակ լինելու պատճառով: Կրթության միջազգային օրվան ընդառաջ և ՔՈՎԻԴ-19 համավարակի երկրորդ տարվա սահմանագծին ՅՈՒՆԻՍԵՖ-ը հրապարակում է երեխաների կրթության վրա համավարակի ազդեցության վերաբերյալ վերջին հասանելի տվյալները։
«Մարտին լրանում է համաշխարհային կրթության ոլորտում կորոնավիրուսային համավարակի պատճառով խափանումների երկու տարին։ Այլ կերպ ասած՝ մեր առջև երեխաների ուսուցման բացթողումների գրեթե անհաղթահարելի ծավալներ ունենք,- նշել է ՅՈՒՆԻՍԵՖ-ի կրթության գծով ղեկավար Ռոբերտ Ջենկինսը:- Թեև կրթության բնագավառում խափանումներին պետք է վերջ տրվի, սակայն միայն դպրոցների վերաբացումը բավարար չէ: Սովորողները մեծ աջակցության կարիք ունեն բաց թողած ուսուցումը վերականգնելու համար: Ոսումնական հաստատությունները պետք է դուրս գան իրենց շրջանակներից՝ վերականգնելու երեխաների հոգևոր և ֆիզիկական առողջությունը, սոցիալական զարգացումը և սնուցումը»:
Երեխաները կորցրել են թվաբանության և տառաճանաչության հիմնական հմտությունները: Համաշխարհային կերպով կրթության խաթարումը հանգեցրեց նրան, որ միլիոնավոր երեխաներ զգալի ծավալներով բաց թողեցին ակադեմիական կրթությունը, որը նրանք ձեռք կբերեին, եթե սովորեին դասարանում: Ընդ որում՝ ամենամեծ բացթողումներն ունենում են ավելի փոքր և մեկուսացած երեխաները:
Ցածր և միջին եկամուտ ունեցող երկրներում դպրոցների փակման հետևանքով ուսուցման բացթողումները հանգեցրել են նրան, որ 10 տարեկան երեխաների մինչև 70 տոկոսը չի կարողանում կարդալ կամ հասկանալ պարզ տեքստեր: Այս ցուցանիշը 53 տոկոսով բարձր է մինչև համավարակը գրանցված ցուցանիշից:
ԱՄՆ-ում ուսուցման բացթողումներ են գրանցվել շատ նահանգներում, այդ թվում՝ Տեխասում, Կալիֆոռնիայում, Կոլորադոյում, Թենեսիում, Հյուսիսային Կարոլինայում, Օհայոյում, Վիրջինիայում և Մերիլենդում: Տեխասում, օրինակ, 3-րդ դասարանի երեխաների երկու երրորդը 2021 թվականին «Մաթեմատիկա» առարկայի քննությանը ցածր արդյունքներ է գրանցել՝ համեմատած 2019 թվականին քննություն հանձնած երեխաների կեսի գրանցած արդյունքների հետ:
Բրազիլիայի մի քանի նահանգներում 2-րդ դասարանցի 4 երեխայից 3-ը չունի բավարար գիտելիքներ ընթերցանությունից ՝ համեմատած մինչև համավարակը գրանցված 2-ից 1-ը ցուցանիշի հետ: Բրազիլիայում 10-15 տարեկան 10 աշակերտից 1-ը հայտնել է, որ չի պատրաստվում վերադառնալու դպրոց, երբ իրենց դպրոցները վերաբացվեն:
Հարավային Աֆրիկայում դպրոցականները 75 տոկոսով և մինչև մեկ լրիվ ուսումնական տարի հետ են մնում նախատեսված կրթական մակարդակից: Ըստ տեղեկությունների՝ 2020 թվականի մարտից մինչև 2021 թվականի հուլիսն ընկած ժամանակահատվածում 400 000-500 000 աշակերտ ընդհանրապես դուրս է մնացել դպրոցից:
Դպրոցների փակման հետևանքները շարունակում են աճել: Բացի ուսուցման բացթողումներից՝ դպրոցների փակումն ազդել է երեխաների հոգեկան առողջության վրա, նվազեցրել սնուցման հասանելիության մակարդակն ու մեծացրել չարաշահումների ռիսկը:
Աճող ապացույցները փաստում են, որ կորոնավիրուսային համավարակի պատճառով երեխաների և երիտասարդների շրջանում գրանցվել են տագնապի և դեպրեսիայի բարձր ցուցանիշներ, իսկ ըստ որոշ ուսումնասիրությունների՝ աղջիկների, դեռահասների և գյուղաբնակների՝ այս խնդիրներին բախվելու հավանականությունն ավելի մեծ է:
Աշխարհում ավելի քան 370 միլիոն երեխա զրկվել է դպրոցական սննդից դպրոցների փակման ընթացքում՝ կորցնելով այն, ինչը որոշ երեխաների համար ամենօրյա սնուցման միակ հուսալի աղբյուրն է:
