Համայնքից գրություններ են ուղարկվել ՀԷՑ ապօրինի էլեկտրասնուցումները դադարեցնելու վերաբերյալ․ ՏԵՍԱՆՅՈՒԹ

Կենտրոն վարչական շրջանի ղեկավարի աշխատակազմի կողմից գրություններ են ուղարկվել «Հայաստանի էլեկտրական ցանցեր» ՓԲ ընկերությանը` ավտոմատ ինքնասպասարկող սարքավորումների ապօրինի էլեկտրական սնուցումները դադարեցնելու, հոսանքալարերն ապամոնտաժելու, ինչպես նաև իրավախախտում թույլ տված անձանց պատասխանատվության ենթարկելու խնդրանքով։ Այս մասին քաղաքապետարանի խորհրդակցության ժամանակ հայտարարեց աշխատակազմի առևտրի, ծառայությունների և գովազդի վարչության պետ Արմեն Առաքելյանը։

«Վարչական շրջանների կողմից ապամոնտաժվել են 12 նոր տեղադրված, առանց համապատասխան թույլտվության ավտոմատ սարքավորումներ, որոնք հաշվառված չեն եղել Gisyerevan.am էլեկտրոնային համակարգում, և կազմվել է թվով 3 արձանագրություն։ Աջափնյակ վարչական շրջանում ապամոնտաժվել է մեկը, Կենտրոն վարչական շրջանի կողմից 3 արձանագրություն է կազմվել, Շենգավիթ վարչական շրջանում ապամոնտաժվել է մեկը, Քանաքեռ-Զեյթուն վարչական շրջանում ապամոնտաժվել է 10-ը։ Նշված ժամանակահատվածում տրամադրվել է 14 թույլտվություն։ Միաժամանակ տեղեկացնում եմ, որ սույն թվականի օգոստոս-սեպտեմբեր ամիսներին Աջափնյակ վարչական շրջանի կողմից կազմվել է 7, Էրեբունի վարչական շրջանի կողմից՝ 60, Կենտրոն վարչական շրջանի կողմից՝ 9, Նոր Նորք վարչական շրջանի կողմից 13 արձանագրություններ, ընդհանուր՝ 89 արձանագրություն»,- ասաց Առաքելյանը։

Տիգրան Ավինյանը եզրակացրեց, որ պրոակտիվ աշխատել են Աջափնյակ, Կենտրոն, Նոր Նորք, Քանաքեռ-Զեյթուն, Արաբկիր վարչական շրջաններրի ղեկավարները։

«Մնացածը՝ մոտավորապես»,- եզրափակեց Ավինյանը։

Մանրամասները՝ տեսանյութում։

Արփի Հակոբյան