Մի բան ասում ենք, մեկ այլ բան՝ անում. Ալվինա Գյուլումյանը՝ դատական համակարգում փոփոխությունների մասին. ՏԵՍԱՆՅՈՒԹ

ԱԺ շենք մտնելիս իմ իրավունքն արդեն իսկ խախտվեց․ իմ անձնագիրը վերցվեց, մնաց անցակետում։ Օրինակը բերում եմ, որովհետեւ մեր դժբախտությունը մեր փարիսեցիության մեջ է՝ մի բան ասում ենք, այլ բան անում ենք: Պետք է կարողանանք ասել այն, ինչ պետք է անել»,- այս մասին նշեց ՀՀ սահմանադրական դատարանի լիազորությունները դադարեցված դատավոր Ալվինա Գյուլումյանը ԱԺ մարդու իրավունքների պաշտպանության և հանրային հարցերի հանձնաժողովի նախաձեռնությամբ այսօր խորհրդարանում կազմակերպված «Կալանքի՝ որպես խափանման միջոցի կիրառման ինստիտուտի արժեզրկման, դատական գործերի ձեռքով մակագրման կարգի խախտումների և դրանց վերացման վերաբերյալ» թեմայով քննարկման ժամանակ:

Քննարկվող թեմայի վերաբերյալ Գյուլումյանը նշեց. «Իմ՝ ՍԴ-ում եղած ժամանակ ՍԴ-ն նախնական կալանքի վերաբերյալ կայացրել է որոշումներ, որոնք կարող են ուղենիշային լինել։ Նախնական կալանքի հետ կապված կա կարևոր միջազգային պահանջ՝ կալանքի օրինականության վերաբերյալ հարցերը պետք է քննարկվեն արագ, անհապաղ։ Մեզ մոտ կալանքի օրինականությունը վիճարկվում է, Վճռաբեկ դատարանը մի քանի ամիս քննարկում է, մինչդեռ այդ ընթացքում անձի կալանքի ժամկետն արդեն կարող է լրացած լինել»:

«Երբ անձն ազատության մեջ է եղել, սակայն փախուստի դիմելու կամ վկաների վրա ազդելու կասկածով նախնական կալանքը երկարաձգվում է, կարելի է մտածել, որ նախնական կալանքն անձի հանդեպ կիրառելու համար այլ նպատակներ կան»,- ընդգծեց Գյուլումյանը:

Մանրամասները՝ տեսանյութում: