Ի՞նչ վիճակում են Արցախից Երևան տեղափոխված ՊԲ երկու զինծառայողները

Հունիսի 17-ին Արցախից Երևան տեղափոխված վիրավոր երկու զինծառայողների վիճակը ծանր է։ Այս մասին Factor.am-ի հետ զրույցում ասացին Երևանի Մուրացանի անվան կենտրոնական կլինիկական հոսպիտալի տնօրենի պաշտոնակատար Արտաշես Խաչատրյանը և Մալայանի անվան ակնաբուժական կլինիկայի տնօրեն Ալեքսանդր Մալայանը։

«Ականի պայթյունի պատճառով երկու աչքն էլ հրազենային վնասվածք է ստացել»,- ասաց Մալայանը՝ հավելելով, որ բացի աչքի շրջանում ստացած վնասվածքներից զինծառայողն այլ վիրավորում չի ստացել։

Հունիսի 17-ին Մալայանի անվան ակնաբուժական կենտրոնում 33-ամյա մայոր Մյասնիկ Հովհաննիսյանին վիրահատել են։ Ինչ վերաբերում է կենտրոնական կլինիկական հոսպիտալում գտնվող զինծառայող Արմեն Վարդանյանին, ապա հոսպիտալի տնօրենի պաշտոնակատարի խոսքով՝ վերջինիս վիճակը կայուն ծանր է։

Տեղեկացնենք, որ Վարդանյանը հրազենային վիրավորում է ստացել գլխի շրջանում, ինչպես նաև՝ մարմնի շրջանում բեկորային վնասվածքներ։

Հիշեցնենք նաև, որ հունիսի 16-ին՝ ժամը 18:05-ի սահմաններում, հակառակորդը հաստոցավոր հակատանկային նռնականետերից խախտել է հրադադարի պահպանման ռեժիմը ՊԲ կենտրոնական ենթակայության զորամասերից մեկի պահպանության տեղամասի ուղղությամբ, ինչի հետևանքով մահացու վիրավորումներ են ստացել ՊԲ զինծառայողներ Արայիկ Ռուդիկի Մատինյանը (ծնված 1997թ.), Վիգեն Ժիրայրի Պետրոսյանը (ծնված 1997թ.) և Վարդան Ծովակի Սարգսյանը (ծնված 1997թ.), իսկ երկու զինծառայող էլ վիրավորում է ստացել։

Սեդա Ղուկասյան