Քաղաքականություն
16.06.2017 | 17:47
«Ելք» դաշինքը ստեղծվել է իշխանության կողմից, որպեսզի այն ընդդիմության անվան տակ ծառայություններ մատուցի գործող ռեժիմին». այս մասին «Ազատության» հետ զրույցում ասել է «Երկիր Ծիրանի» կուսակցության նախագահ Զարուհի Փոստանջյանը։
«Նման բան ասելու համար պետք է փաստեր ներկայացնի Զարուհի Փոստանջյանը»,- Factor.am-ի հետ զրույցում հակադարձելով Փոստանջյանին ասաց «Ելք» խորհրդարանական խմբակցության պատգամավոր Սասուն Միքայելյանը։
Մեր դիտարկմանը, որ ըստ Փոստանջյանի՝ «Ելք»-ի դիրքորոշումները համընկնում են իշխանության քաղաքական գծի հետ, Միքայելյանն ասաց․ «Ստից խոսակցություններից հոգնել ենք, Զարուհի Փոստանյանի հետ բանավեճի մեջ մտնել չենք ուզում»։
Երևանի ավագանու «Ելք» խմբակցության ղեկավար Դավիթ Խաժակյանն էլ ասաց․ «Մենք նման խոսքերով չենք մեկնաբանելու, որովհետև ըմբռնումով ենք մոտենում, որ տիկին Փոստանջյանը մանդատից զրկվելով զրկվել է նաև քաղաքական ողջախոհությունից։ Ցանկացած ժողովրդավարական պետության մեջ քաղաքական ծաղրածուները տեղ ունեն, տիկին Փոստանջյանն էլ ստանձնել է այդ ծանր բեռը»։
