24.04.2026 | 23:32
Կապանում ջրանջատում կլինի
Կրեմլից մանրամասներ են հայտնել Վլադիմիր Պուտինի և Ջո Բայդենի բանակցություններից
Քաղաքականություն
06.12.2021 | 15:19
Սպիտակ տան մամուլի քարտուղար Ջեն Փսաքին հաստատել է՝ դեկտեմբերի 7-ին Միացյալ Նահանգների նախագահ Ջո Բայդենը կխոսի Ռուսաստանի նախագահ Վլադիմիր Պուտինի հետ պաշտպանված տեսակապի միջոցով։
ՌԴ նախագահի մամուլի քարտուղար Դմիտրի Պեսկովը պարզաբանել է, որ Ռուսաստանի և ԱՄՆ-ի ղեկավարները կքննարկեն երկկողմ հարաբերությունները, փոխանցում է «ՌԻԱ Նովովստին»։
Բանակցությունները կանցկացվեն դեկտեմբերի 7-ի երեկոյան։ Տեղեկացվում է, որ ուղիղ հեռարձակում չի լինելու, սակայն առցանց միջոցառման առաջին կադրերը կցուցադրվեն լրագրողներին։
«Իհարկե, անհրաժեշտ կլինի քննարկել, թե ինչպես են իրականացվում Ժնևում ձեռք բերված փոխըմբռնումները, աչքի անցկացնել, տեսնել, թե ինչն է ամբողջությամբ իրականացվում և ինչն է պահանջում լրացուցիչ ջանքեր»,- հավելել է Կրեմլի խոսնակը։
Մյուս թեմաներն են լինելու Ուկրաինայի շուրջ ստեղծված լարվածությունը, ՆԱՏՕ-ի առաջխաղացումը դեպի Ռուսաստանի սահմաններ և անվտանգության երաշխիքների վերաբերյալ Ռուսաստանի ղեկավարի նախաձեռնությունը: Ավելի վաղ ՌԴ ղեկավարի օգնական Յուրի Ուշակովը նշել էր, որ օրակարգում կարող է ներառվել նաև իրավիճակը Աֆղանստանում, Իրանում և Լիբիայում։
Պեսկովը մանրամասնել է, որ բանակցություններին հաջորդող համատեղ հայտարարություն չի նախատեսվում։
Տաթև Ֆռանգյան
