11.02.2026 | 14:13
Փաշազադեն Վատիկանում հանդիպել է Հռոմի Լևոն XIV պապին
Թուրքիայի արժութային ճգնաժամի մեղավորն Էրդողանն է, նա է պատասխանատվություն կրում․ Financial Times
Քաղաքականություն
30.11.2021 | 23:05
Թուրքիայի նախագահ Ռեջեփ Թայիփ Էրդողանն է պատասխանատվություն կրում անսովոր արժութային ճգնաժամի համար ֆինանսական շուկաներում։ Այս մասին գրել է Financial Times-ը, որին վկայակոչում է «Ահվալ» գործակալությունը։
Նշվում է, որ ճգնաժամը, որի հետևանքով լիրայի փոխարժեքը դոլարի և եվրոյի նկատմամբ հասել է բոլոր ժամանակների նվազագույնին, ոչ թե տնտեսական հիմք ունի, այլ պայմանավորված է Էրդողանի՝ գնալով ավելի անկանոն որոշումների կայացմամբ և երկրի Կենտրոնական բանկի վրա նրա ունեցած ազդեցությամբ:
«Մինչև նա չփոխի քաղաքականությունը, միակ հարցը, որը ծառացած է Թուրքիայի առաջ՝ երկիր, որը մեծ նորուժ ունի, այն է՝ որքան երկար է մնալու նախագահը և դեռ ինչքան վնաս նա կարող է հասցնել գնալուց առաջ»,- ասվում է հրապարակման մեջ։
Հիշեցնենք, որ նախորդ շաբաթ թուրքական լիրան արժեզրկման պատմական ռեկորդ էր գրանցել՝ մեկ դոլարի նկատմամբ հասնելով 13․52-ի։ Այս տարվա ընթացքում կորուստները կազմել են ավել քան 40 տոկոս։
Էրդողանն էլ Թուրքիայի տնտեսական խնդիրների մեղքը բարդում է, այսպես կոչված, տոկոսադրույքների լոբբիի վրա, որը, ըստ նրա, Թուրքիայի տնտեսությունը ձգտում է ծնկի բերել՝ Կենտրոնական բանկին ստիպելով տոկոսադրույքները բարձրացնել։ Բացի այդ, Էրդողանը նաև հրամայել է հետաքննություն սկսել ընկերությունների ու անհատների կողմից լիրայի փոխարժեքի հնարավոր մանիպուլյացիաների հետ կապված։
«Եթե նախագահը շարունակի տոկոսադրույքների իջեցման ծրագիրը, ապա լիրան կնվազի, իսկ գները անխուսափելիորեն կաճեն։ Ընդդիմադիր կուսակցությունները լավատես են, որ Էրդողանն իր իշխանության վերջին տարիներին է և 2023 թվականին նշանակված ընտրությունները վերջ կդնեն արատավոր պարույրին»,- ասվում է հրապարակման մեջ։
Էմմա Չոբանյան
