18.12.2025 | 19:26
Պապիկյանը ՆԱՏՕ-ի գլխավոր քարտուղարի տեղակալի հետ քննարկել է գործընկերության ընթացքը և զարգացման հեռանկարները
Ստեղծված իրավիճակը ավտորիտար համակարգի արդյունքն է․ Սելինա Դողանը Թուրքիայի կայունացումը արտահերթ ընտրությունների միջոցով է տեսնում
Քաղաքականություն
27.11.2021 | 18:05
Թուրքիան այժմ խորը ճգնաժամի մեջ է: Factor.am-ի հետ զրույցում ասաց Ստամբուլի հայաշատ Շիշլի թաղամասի ընդդիմադիր «Ժողովրդահանրապետական» կուսակցության ավագանու անդամ Սելինե Դողանը՝ խոսելով այս օրերին Թուրքիայում տեղի ունեցող բողոքի ակցիաների վերաբերյալ, որոնք թուրքական լիրայի արժեզրկման և գնաճի պատճառով են։
«Այո՛, կարծես թե հիմնական պատճառը տնտեսական ճգնաժամն է, բայց իրականում տնտեսական իրավիճակը արդյունք է։ Այն վերջին տարիներին ստեղծված ավտորիտար համակարգի արդյունքն է։ Մասնավորապես 2016 թվականի ռազմական հեղաշրջման փորձից հետո ընդունված նախագահական կառավարման՝ «մեկանձի» համակարգի արդյունքն է, երբ ամեն ինչ կախված է մեկ անձից ու նրա կուսակցությունից»,- ասաց նա։
Հիշեցնենք, որ Թուրքիայի արժույթը վերջին շաբաթվա ընթացքում ամեն օր նոր հակառեկորդ է սահմանում դոլարի ու եվրոյի համեմատությամբ։ Դրա արդյունքում երկրում թանկացումներ են, ինչի պատճառով էլ մեծ քաղաքներում Անկարայում, Ստամբուլում, Իզմիրում բողոքի ակցիաներ են տեղի ունենում։ Իրավիճակից դժգոհ է նաև երկրի ընդդիմությունը, որը խնդրի լուծումը տեսնում է արտահերթ ընտրությունների միջոցով։
Սելինա Դողանի խոսքով՝ ստեղծված իրավիճակում կան բոլոր պայմանները արտահերթ ընտրությունների համար։
«Օրենքի գերակայություն, Կենտրոնական բանկի անկախություն հաստատելու, երիտասարդներին այս երկրում պահելու և ապագայի նկատմամբ հույս ունենալու համար մեզ քվեատուփեր են պետք»,- ասաց նա։
Ըստ Սելինա Դողանի՝ Թուրքիայի զարգացումը բնականոն հունի վրա դնելու համար նրանք պետք է գործի դնեն խորհրդարանական համակարգը և այն ամրապնդեն։
Հռիփսիմե Հովհաննիսյան
