Ըստ ԱՎԾ-ի թվերի՝ Հայաստանից արտագաղթում են աշխատանք ունեցող, կայացած մասնագետները

Ըստ ԱՎԾ-ի թվերի՝ Հայաստանից արտագաղթում են աշխատանք ունեցող՝ կայացած մասնագետները ՀՀ ազգային վիճակագրական ծառայության հրապարակած տվյալների համաձայն 2017 թվականին Հայաստանում գործազրկության միջին մակարդակը կազմել է 17,8 տոկոս, ինչը 0,2 տոկոսով պակաս է քան 2016 թվականի նույն ցուցանիշը։ Բացարձակ արժեքով, ըստ ԱՎԾ-ի, գործազրկությունը պակասել է 1300-ով։ Իրականում պաշտոնական վիճակագիրներն այս դեպքում համեստություն են դրսևորել, քանի որ գործազրկության ավելի ցածր թիվ էլ կարող էին նշել։ Բանն այն է, որ անցած տարվա ընթացքում Հայաստանից մեկնել և չի վերադարձել կամ այլ կերպ ասած Հայաստանից արտագաղթած քաղաքացիների թիվը կազմել է 36 հազար 191։ Իսկ, ինչպես հայտնի է, մեծուփոքր պաշտոնյաները տարիներ շարունակ պնդում են, թե արտագաղթի հիմնական պատճառը սոցիալական է, այսինքն մարդիկ Հայաստանում գործ չգտնելով հեռանում են։ Հետևաբար, արտագաղթածները պետք է հենց այդ գործազուրկները լինեին և նրանց թիվը պետք է ավելի շատ պակասեր։ Մի գուցե, ԱՎԾ-ն ակնարկում է, որ ոչ թե գործազուրկներն են արտագաղթում, այլ հենց աշխատանք ունեցող ու կայացած մասնագետները, որոնց տեղը հեշտ չի լրացնել, դրա համար նրանց հեռանալը չի ազդում գործազրկության ցուցանիշի վրա։ Եթե այդպես է, ապա կստացվի, որ արտագաղթի պատճառները ամենևին էլ սոցիալական չեն, այլ՝ քաղաքական։ Մի խոսքով, առավել ևս ներկա կարևոր քաղաքական փուլում, պաշտոնական վիճակագիրները պետք է հստակ կողմնորոշվեն, թե իրենց թվերով ինչ են ցանկանում ասել․ մարդիկ Հայաստանից հեռանում են, որովհետև չեն կարողանում գումար վաստակել, թե պարզապես գաղջի մեջ չեն ցանկանում ապրել։

Վահագն Հովակիմյան