Գործակալական որսը, շահարկումները կուզեի ավարտվեին․ եթե լյուստրացիայի քաղաքական որոշում լինի, կաջակցեմ. Կարեն Անդրեասյան. ՏԵՍԱՆՅՈւԹ

Factor TV-ի հարցազրույցը Արդարադատության նախարար Կարեն Անդրեասյանի հետ:

–Հայաստանյան իրավապաշտպանների շրջանում մեծ դժգոհություն է առաջացել այն փաստից, որ օրերս Հայաստանի ԱԱԾ տնօրենը մասնակցել է ՌԴ նախագահի գլխավորած հատուկ ծառայությունների հավաքին։ Նախ՝ ինչո՞ւ պետք է սուվերեն պետության ԱԱԾ տնօրենը մեկ այլ պետության ղեկավարի գլխավորած հանդիպմանը մասնակցի, և երկրորդ՝ ինչպե՞ս է ստացվել, որ ՀՀ ԱԱԾ տնօրենը ոչ ժողովրդավարական պետությունների հատուկ ծառայությունների ղեկավարների հետ հանգում է այսպիսի պաշտոնական հաղորդագրության. «Հանդիպմանը քննարկվել են հարցեր՝ ԱՊՀ պետությունների վրա կոլեկտիվ Արևմուտքի ապակառուցողական ազդեցության և դրսից «ժողովրդավարություն» բռնի կերպով արմատավորելու փորձերի համատեքստում։ Հատուկ գերատեսչությունների ղեկավարները հանգել են այն միասնական կարծիքին, որ այդ գործընթացներն ուղղված են ԱՊՀ երկրներում ներքաղաքական իրավիճակի ապակայունացմանը, համակարգված ու նպատակասլաց բնույթ են կրում…, և պայմանավորվել են այդ գործընթացներին հակազդելու համատեղ ջանքերի ակտիվացման անհրաժեշտության մասին»։ Ինչպե՞ս է ՀՀ–ն միացել այսպիսի պաշտոնական հայտարարությանը։

-Հայաստանը նման հայտարարության չի միացել, չգիտեմ ինչ հաղորդագրություն ներկայացրիք:

–Պաշտոնական հաղորդագրությունն է՝ այդ հանդիպման արդյունքներն ամփոփող:

-Հայտարարությանը միանալը մի կատեգորիա է, ինչ-որ հաղորդագրություն ստանալ՝ թեկուզ պաշտոնական, թեկուզ շատ վստահելի աղբյուրից, այլ կատեգորիա է: Ես նորից պետք է հիշեցնեմ, որ ամեն հարցով չէ, որ ես պետք է բոլորի փոխարեն պատասխանեմ, շատ ճիշտ կլիներ, որ այն մարդիկ կամ իրենց ներկայացուցիչները, ովքեր եղել են այդ հավաքին, ձեզ տեղեկություններ տրամադրեն՝ հարցազրույցի, հայտարարության կամ հարցման ֆորմատով, դա արդեն ձեր երկկողմ որոշելիքն է: Բայց նախ մի ընդհանուր բան ասեմ. մեկնաբանել հայտարարություններ՝ նույնիսկ պաշտոնական՝ կոնտեքստին ամբողջական ծանոթ չլինելով, թույլ չեմ տալիս ոչ միայն ինձ՝ որպես ավելի զուսպ կողմ, այլև ցանկացած քաղաքական կամ հասարակական գործչի: Ինչ վերաբերում է ժողովրդավարությանը, ինձ անընդհատ այս հարցը միշտ ուրիշ ենթատեքստով են տալիս, երբ մի ցավալի միջադեպ է լինում, օրինակ՝ ոստիկանության հետ կապված որևէ միջադեպ, որտեղ ընդունենք, որ շատ վատ է վարվել պետական որևէ պաշտոնյա, ծառայող: Եվ դրանից հետո ինձ կառավարության նիստերից առաջ կամ հետո խոսափողը մոտեցնում են՝ շատ ագրեսիվ տրամադրվածությամբ և ասում՝ դուք որպես ժողովրդավարական իշխանության մաս, միշտ խոսել եք մարդու իրավունքներից, ժողովրդավարությունից, իսկ հիմա այսպիսի մի խայտառակ իրավիճակ է երկրում: Ես ուզում եմ այս չափազանցության, ծայրահեղացման գործընթացը դադարի գոնե այս տաղավարում, որտեղ մենք կարող ենք զրուցել առանց ձևականությունների, պարզ: ժողովրդավարությունը վտանգված է այն դեպքում, երբ ամենակոպիտ կամ նույնիսկ ամենաքիչ կոպիտ խախտումները համատարած են, համակարգային են և ուղղորդված են բարձրագույն մակարդակից, և կամք չկա այդ խախտումները հաղթահարելու։

–Այսինքն՝ դուք այս իշխանության և նախորդ իշխանությունների օրոք տեղի ունեցող խախտումները չե՞ք նույնացնում:

–Միանշանակ չեմ նույնացնում, որովհետև նորից եմ ասում՝ կարևոր է համակարգված է, թե ոչ, և որտեղից է գալիս այդ հրամանը, այսինքն՝ թեկուզ միջին օղակի ղեկավարներ դիտավորյալ ուզում են որևէ մեկի իրավունքը խախտե՞լ: Ես չեմ ուզում անցյալ գնալ, որովհետև դա էլ մյուս ճահիճն է, և մեր իշխանությունը պետք է ամեն ինչ անի, որ չմտնի այդ ճահիճը: Ես ո՛չ ուզում եմ մեր այսօրվա խնդիրները բացատրել անցյալով, ո՛չ ուզում եմ անընդհատ անցյալի համեմատությունների մեջ գտնեմ որևէ դրական մի բան… Այդ ճահիճից դուրս մի բան կարող եմ ասել հաստատ. իմ որևէ վերադաս, ո՛չ իմ մակարդակով, ո՛չ էլ իմ ստորադաս մակարդակում հրամաններ չի տալիս և կոնկրետ ցանկություններ չի հայտնում որևէ մարդու իրավունքները խախտելու վերաբերյալ, չկա ժողովրդավարության դեմ որևէ համակարգված աշխատանք:

-Հայաստանցի կոռուպցիոներները, թալանչիները հատկապես հեղափոխությունից հետո մշտապես սպասել են ԱԱԾ-ի այցին։ Բայց հիմա ստեղծվում է Հակակոռուպցիոն կոմիտե, որը կունենա օպերատիվ ծառայություն։ Ինչպե՞ս անել, որ մի հրեշից ազատվելով՝ չունենանք մեկ այլ գիգահրեշ, որը կանի այն ամենը, ինչ անում էր նախորդը:

-Արդարացի հարց է, որովհետև իսկապես հրեշին սպանողը ինքը կարող է հրեշ դառնալ, բայց ամեն դեպքում իմ հավատը համակարգային երևույթների մեջ է: Իրենք էլի զրոյից են կառուցում, շենքից սկսած` մեր նախարարությունն է աջակցում, որ այդ հակակոռուպցիոն կոմիտեն ստեղծվի, սկսած օրենսդրական բազայից, որոշ դեպքերում նաև կադրերից, մեր նախարարաության ներկայացուցիչն էլ էր այն հանձնաժողովի մեջ, որտեղ կային քաղաքացիական հասարակության ներկայացուցիչներ, որոնք ընտրում էին այսպիսի պաշտոնյայի: Հենց միայն այդ պրոցեսը, թե ինչպես է հակակոռուպցիոն կոմիտեի նախագահ ընտրվել, արդեն նոր, լուրջ բան է, պատկերացնո՞ւմ եք՝ ժամանակին ԱԱԾ տնօրենին ընտրեին հասարակական կազմակերպությունից ու արդարարադատության նախարարությունից ներգրավված հանձնաժողովի անդամները:

-Երևի թե կարևորը կադրային խնդիրն է:

-Միանշանակ, մենք հակակոռուպցիոն կոմիտեի հետ ստեղծում ենք նաև նոր հակակոռուպցիոն դատարան, կարևոր է, որ դատավորները մի քանիսն են լինելու, բայց արդեն պետք է վեթինգ եղած լինի, այսինքն՝ դատավորները նոր մարդիկ պետք է լինեն, որոնց բարեվարքությունը ստուգում է կոռուպցիայի կանխարգելման հանձնաժողովը:

-Այսինքն՝ լինելու է այդ պրիզման:

-Մենք մեծ համակարգ ենք ստեղծում, նոր ստեղծվող կոռուպցիայի կանխարգելման հանձնաժոողվը ստուգելու է նոր դատավորներին, ովքեր գալու են հակակոռուպցիոն դատարան, իսկ հակակոռուպցիոն դատարանը ստուգելու է, թե ինչ է անում Հակակոռուպցիոն կոմիտեն՝ չհաշված, որ իր օրենսդրական կառուցակարգերը այնպիսին են, որ շատ էլ ուզենան, բոլորը իրար հետ դժվար դառնան այն սարսափելի գաղտնալսող ու չգիտեմ ինչեր անող մոնստր մարմինը, որ խորհրդային շրջանում կոչում էին ԿԳԲ: Այսինքն՝ մենք ոչ մի մարմնի այլևս չենք տալիս այդպիսի մեծ հզորություններ, որ ոչ մի մարմին այդպիսի հրեշային ազդեցություն չունենա երկրի վրա:

Հարցազրույցն ամբողջությամբ՝ տեսանյութում։

Ռոբերտ Անանյան