Պետական պարտքը փետրվարին մի փոքր նվազել է, իսկ մարտին կրկին կավելանա

Այս տարվա փետրվարին վերջին տասը տարվա կտրվածքով առաջին անգամ պետական պարտքը նվազել է։ ՀՀ ֆինանսների նախարարության հրապարակած հաշվետվության համաձայն՝ այս տարվա մարտի 1 դրությամբ Հայաստանի պետական պարտքը կազմել է 6 միլիարդ 851 միլիոն 200 հազար դոլար։ Սա այն դեպքում, երբ հունվարի 31-ին այդ ցուցանիշը եղել է 6 միլիարդ 898 միլիոն 100 հազար դոլար։ Այսինքն՝ փետրվար ամսվա ընթացքում Հայաստանի պետական պարտքը նվազել է 46 միլիոն 900 հազար դոլարի չափով։

Մասնավորապես, Հայաստանի արտաքին պետական պարքը, կամ այլ կերպ ասած՝ միջազգային ֆինանսական կազմակերպությունների և բանկերի հանդեպ ունեցած պարտավորությունները փետրվարի ընթացքում նվազել են 15,7 միլիոն դոլարով և կազմել 5 միլիորդ 559 միլիոն 800 հազար դոլար։ Իսկ Հայաստանի ներքին պետական պարտքը նվազել է 31 միլիոն 200 հազար դոլարով և կազմել 1 միլիարդ 291 միլիոն 400 հազար դոլար։

Այն, որ Հայաստանի պետական պարտքը նվազել է, լավ է, բայց հիմնավոր մտավախություն կա, որ դա ընդամենը ժամանակավոր բնույթ է կրում։ Բանն այն է, որ ընթացիկ ամսում պետական պարտատոմսեր տեղաբաշխելու հաշվին Հայաստանի ներքին պետական պարտքը ծրագրված է ավելացնել 8 միլիարդ 400 միլիոն դրամով կամ նույնն է, թե՝ 17 միլիոն 500 հազար դոլարով։ Այլ կերպ ասած՝ պետական պարտքի նվազումը ոչ թե լավ վիճակով է պայմանավորված եղել, այլ նախկինում վերցված վարկերի և պետական պարտատոմսերի ժամկետի լրանալով։ Հակառակ դեպքում՝ ՀՀ ֆինանսների նախարարությունը վերը նշված ծավալներով պետական նոր պարտատոմսեր չէր տեղաբաշխի։

Վահագն Հովակիմյան