Մեղադրանքները ծիծաղելի են. Գեղամասարի համայնքապետը պարզաբանում է՝ ինչ է խոսել ԱԱԾ-ում. ՏԵՍԱՆՅՈՒԹ

«Մենք համայնքների խոշորացմանը ի սկզբանե դեմ չենք եղել: 2017թ. ձևավորվել է Գեղամասար  խոշորացված համայնքը՝ իր 18 բնակավայրերով: Արդեն մոտ 4 տարի է այդ համայնքում բազմաթիվ գործեր են արվել, 16 գյուղ այսօր խմելու ջուր ունի, մյուս երկու գյուղերի ջրավազանը պատերազմից հետո անցել է ադրբեջանական վերահսկողության տակ»,- նշեց Գեղամասար համայնքի ղեկավար Հակոբ Ավետյանը:

Նա հավելեց, որ արդեն իսկ խոշորացված Գեղամասար համայնքը նորից ուզում են խոշորացնել, ինչին դեմ է: «Եթե միավորվի Վարդենիս համայնքի հետ, մտավախություն կա, որ համայնքի գյուղերը անուշադրության կմատնվեն, առանց այն էլ դժվար  ապրելակերպ է սահմանամերձ դարձած այդ գյուղերում: Արդեն հարցականի տակ է մարդկանց այնտեղ մնալ – չմնալը, մի փոքր էլ եթե անհարմարավետություն ստեղծվի, մարդիկ կսկսեն արտագաղթել: Իսկ արտագաղթը վնաս է ոչ միայն համայնքին, այլ նաև ամբողջ պետությանը: Եթե սահմանային այդ հատվածում բնակչություն չլինի, պաշտպանությունը կթուլանա»,- ասաց համայնքապետը:

«Ես «Հայաստան» դաշինքին եմ պաշպանել և այս իշխանության համար ընդունելի ղեկավար չեմ: Բայց եթե ես ընդդիմադիր հայացքներ ունեմ, չի նշանակում, որ ես պետությանը դեմ քայլ կանեմ: Եթե հարցը վերաբերում է անվտանգությանը, ես պատրաստ եմ իմ անձնական բոլոր հարցերը մի կողմ դնել»,- նշեց Ավետյանը՝ հավելելով, որ իրեն առաջարկվել է հրաժարական տալ:

«Անցյալ տարի ինձ կալանավորեցին՝ քրեական ենթամշակույթի վերաբերյալ հոդվածով, բայց բացարձակապես հիմք չկար»,- նշեց Գեղամասարի համայնքապետը: Նա հավելեց, որ հրավիրել են նաև ԱԱԾ: «Բոլոր մեղադրանքները ծիծաղելի են»,- ընդգծեց Ավետյանը՝ հավելելով, որ իր նկատմամբ քաղաքական հետապնդում է իրականացվում:

Մանրամասները՝ տեսանյութում: