25.03.2026 | 14:44
Մեծամորում դիտավորյալ ավտոմեքենայի հրկիզման դեպքով կալանավորվել է 29-ամյա տղամարդ, ներգրավվել է անչափահաս
Գորիս-Կապան միջպետական ճանապարհը բացվել է․ ՏԵՍԱՆՅՈՒԹ
Քաղաքականություն
27.08.2021 | 20:08
Գորիս-Կապան միջպետական ճանապարհի՝ օգոստոսի 25-ից փակված Գորիս-Որոտան և Շուռնուխ-Կարմրաքար հատվածները վերաբացվել են։ Այս մասին տեղեկացնում է ՀՀ Ազգային անվտանգության ծառայությունը։
Նշվում է, որ Գորիս-Կապան միջպետական ճանապարհը բաց է բոլոր տեսակի տրանսպորտային միջոցների երթևեկության և քաղաքացիների ազատ տեղաշարժի համար։
Սյունիքի փոխմարզպետ Նարեկ Բաբայանը Factor.am-ին հայտնեց, որ երկու օր շարունակ ադրբեջանական զինուժի կողմից փակ պահված ճանապարհը բացվել է քիչ առաջ։
«Եռակողմ բանակցությունները քիչ առաջ ավարտվեցին, ձեռք է բերվել պայմանավորվածություն, որի արդյունքում ճանապարհը բացվել է»,- ասաց փոխմարզպետը։
Հիշեցնենք, որ օգոստոսի 25-ին՝ ժամը 23:00-ի սահմաններում, ադրբեջանական կողմը փակել էր Կապան-Գորիս միջպետական ճանապարհի Կարմրաքար-Շուռնուխ հատվածը: Տարհանվել էին այդ հատվածում գտնվող տրանսպորտային միջոցները: Մարդու իրավունքների պաշտապանն էլ ավելի ուշ հայտնել էր, որ ադրբեջանական զինված ծառայողները փակել էին նաև Գորիսից Որոտան տանող ճանապարհը։
Նշենք, որ երեկ՝ օգոստոսի 26-ին, Սյունիքի փոխմարզպետ Կարո Ավանեսյանը մեզ հայտնել էր, որ Կարմրաքար-Շուռնուխ, Գորիս-Որոտան ճանապարհահատվածների բացման շուրջ եռակողմ բանակցություններ են ընթանում։ Ավելի վաղ Ավանեսյանը մեզ տեղեկացրել էր, որ ադրբեջանական կողմը չի ցանկացել բանակացություններ վարել հայկական կողմի հետ, ուստի դրանք վերսկսելու համար միացել էր նաև ռուսական կողմը։ Այդքան ձգձգված բանակցությունները, սակայն, այդպես էլ արդյունք չէին տվել։
Արփի Հակոբյան
