19.11.2024 | 16:28
Քաղաքացիության պարտադիր պայման սահմանելը հակասում է փախստականների իրավունքների մասին կոնվենցիային
Երեկ լրագրողների նկատմամբ զանգվածային բռնություն է գործադրվել․ Դանիել Իոաննիսյան․ ՏԵՍԱՆՅՈՒԹ
Քաղաքականություն
26.08.2021 | 11:56
«Երեկ լրագրողներին ուժով դուրս շպրտեցին ԱԺ դահլիճի օթյակից, նրանց վրա բռնության հետքեր կային: Երբեք չէի պատկերացնի, որ ՀՀ խորհրդարանում լրագրողների նկատմամբ անվտանգության աշխատակիցները կարող են զանգվածային բռնություն գործադրել»,- «Բռնություններ, նոր սահմանափակումներ լրագրողների համար» թեմայով առցանց քննարկման ժամանակ նշեց «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը։
«Լրագրողների դեմ բռնության հետ կապված՝ մենք արդեն ներկայացրել ենք հանցագործության մասին 4 հաղորդում․ մեկը վերաբերում է օգոստոսի 10-ի դեպքին, երկուսը՝ օգոստոսի 24-ին, և վերջինը՝ երեկ տեղի ունեցածին, երբ ԱԺ դահլիճից ուժով դուրս շպրտեցին լրագրողներին,»-ներկայացրեց Իրազեկ քաղաքացիների միավորման ծրագրերի համակարգող Դանիել Իոաննիսյանը։
Իոաննիսյանի պարզաբանմամբ՝ լրագրողների նկատմամբ գործադրված բռնությունը ժողովրդավարության հետ աղերս չունեցող գործընթաց է սա։
«Ցավալի է, որ իշխանության ներկայացուցիչները հավատացած են, որ այն, ինչ տեղի է ունենում, ժողովրդավարական է մի պարզ պատճառով, որ իրենք ընտրվել են… Ժողովրդավարությունը բազմակոմպոնենտ է, և այդ կոմպոնենտներից մեկը խոսքի ազատությունն է, տեղեկություն ստանալու ազատությունն է»,-նշեց Իոաննիսյանը։
Համեմատելով 2018 թվականի հետհեղափոխական առաջին ամիսների հետ՝ նա նշեց, որ գլոբալ առումով իշխանության թափանցիկության շատ ուժեղ սղաճ է տեղի ունենում։
«Կառավարության առաջին նիստերի ժամանակ մենք տեսնում էինք ռեալ քննարկում։ Այս երեք տարիների ընթացքում կառավարության նիստերի քննարկումները սղաճ են ապրել, վերածվել են դեկորատիվ, PR ակցիայի, երբ կառավարության նիստերի ժամանակ ուղղակի «ռեկլամվում» են այն որոշումները, որ կայացվում են։ Դրանք չեն քննարկվում հանրության աչքի առջև։ Նույնը վերաբերում է խորհրդարանին, որտեղ թափանցիկության անկում է»,- նշեց Իոաննիսյանը:
Մանրամասները՝ տեսանյութում:
