Եթե պաշտոնյաները հերթապահության նշանակվեն դիրքերում, արագ կլուծվեն շատ խնդիրներ․ Վովա Վարդանով․ՏԵՍԱՆՅՈՒԹ

Զինված ուժերի ռեֆորմների, բանակի պատրաստության մասին զրուցել ենք «Ողջ մնալու արվեստը» կազմակերպության ղեկավար Վովա Վարդանովի հետ

-Հայաստանում մեկնարկում են պահեստազորի եռամսյա հավաքները, և մասնակիցներին, հնարավոր է, ուղարկեն մարտական հերթապահության։

-Այստեղ կա մի առավելություն, որ դու ստանում ես օրինական ճանապարհով մարդուն դիրքեր հանելու հնարավորություն, և եթե բանակում մարդկային ռեսուրսների պակաս կա, շեշտում եմ՝ եթե պակաս կա, լրացնել։ Բայց մենք այդ խնդիրը ունե՞նք։ Ես չգիտեմ։ Թող մարդկանց հետ ուղիղ խոսեն։ Թե՞ իրենց թվում է՝ Ադրբեջանի հետախուզությունը տեղյակ չէ՝ այդ պակասը կա, թե չկա։

Գաղտնիք են պահում այն, ինչից ավելի լավ են տեղյակ թուրքական հետախուզությունն էլ, մնացածն էլ, քան քո սպաները։ Դրա ի՞նչն է գաղտնիք։

Ձևեր թափելը պետք չէ։ Ունե՞նք մարդկանց պակաս, կամավորներին չես կարո՞ւմ հավաքես, հայտարարում ես, որ էս-էս-էս պատճառներով եռամսյա հավաքներ եմ անում կամ միամսյա հավաքներ եմ անում․ 15 օր սովորեցնելու եմ, 15 օր՝ տանեմ հերթապահության։ Օրենքի ուժը կիրառիր, բայց ժողովրդիդ հետ ազնիվ եղիր։

-Մասնակցության մասին ասվում է, որ պաշտոններին կցվածները չեն մասնակցելու վարժանքներին, իսկ մնացած բոլորը կարող են ներգրավվել։ Բայց կա նաև այսպիսի քննադատություն, որ եթե պաշտոնյաները մի օրով տարվեն դիրքեր և նշանակվեն հերթապահության, ապա դիրքերի հարցերը արագ կլուծվեն։

-Շատ, շատ ավելի արագ կլուծվեն, իհարկե։ Եթե սրտաճմլիկ պատմություններ պատմող պաշտոնյան գնա, տեսնի, որ այս պահին, ցավոք, առաջնագիծը զիջելու պատճառով մենք հսկայական առաջնագիծ ունենք՝ Զոդից մինչև Արաքս գետ, և այն բոլորովին այն վիճակում չէ, որում պաշտոնյաները թողել են մեր հյուսիսարևելյան դիրքերը, ինձ թվում է՝ մի երկու բան կփոխվի շատ, շատ արագ։ Մանավանդ իրենց պաշտպանելու համար իրենք վիզ կդնեն, իրենց հիմնարկներից բյուջեի կտորներ կճարեն, ֆինանսավորում կճարեն։

Հարցազրույցն ամբողջությամբ՝ տեսանյութում։

Գարիկ Հարությունյան