Արմեն Չարչյանը կրկին կկալանավորվի

Վերաքննիչ քրեական դատարանը՝ դատավոր Ռուբեն Մխիթարյանի նախագահությամբ, քիչ առաջ որոշում կայացրեց բավարարել Գլխավոր դատախազության բողոքը և «Հայաստան» դաշինքի անդամ, «Իզմիրլյան» բժշկական կենտրոնի նախկին տնօրեն Արմեն Չարչյանին կրկին կալանավորել։

Նշենք՝ հուլիսի 21-ին Երևանի ընդհանուր իրավասության դատարանը՝ դատավոր Վահե Միսակյանի նախագահությամբ, որոշում էր կայացրել բավարարել Արմեն Չարչյանին գրավի դիմաց ազատ արձակելու մասին պաշտպանների միջնորդությունը՝ գրավի չափ սահմանելով 15 մլն ՀՀ դրամը։

Պաշտպանական կողմի դիտարկմամբ՝ դատավոր Մխիթարյանն ակնհայտ ապօրինի որոշում է կայացրել, քանի որ Չարչյանը, մեկ ամիս լինելով ազատության մեջ, պատշաճ վարքագիծ է դրսևորել․

«Ոչ իրավաչափ գործողություն պարոն Չարչյանը չի կատարել, այսինքն՝ տրամաբանությունը ո՞րն է կրկին կալանավորել։ Դա միայն մենք չէ, որ հասկանում ենք, դատավորն էլ է հասկանում, ուղղակի դրսից ներս առկա են համապատասխան ճնշումներ»,- Factor.am-ի հետ զրույցում նշեց պաշտպան Էրիկ Ալեքսանյանը՝ հավելելով, որ այս պահին Արմեն Չարչյանը դեռ ազատության մեջ է, սպասում են դատարանի որոշմանը, որպեսզի պատգամավորը ներկայանա ՔԿՀ։

Հիշեցնենք, որ նախընտրական քարոզարշավի ժամանակ մեկում հրապարակվել էր ձայնագրություն, որում «Իզմիրլյան» բժշկական կենտրոնի տնօրեն Արմեն Չարչյանը հունիսի 18-ի առավոտյան աշխատակիցների հետ հանդիպմանը հորդորել էր, որ աշխատակիցները պարտադիր կարգով մասնակցեն ընտրություններին։ Ձայնագրության հրապարակումից հետո հաշված ժամերի ընթացքում ՀՔԾ-ում հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով։

Ռոզա Վարդանյան