Քննչական կոմիտեն մանրամասներ է հայտնել Զարուհի Փոստանջյանի ամուսնու ավտոմեքենայի հրկիզումից

Ինչպես արդեն տեղեկացրել ենք, օրեր առաջ հրդեհվել էր «Երկիր Ծիրանի» կուսակցության նախագահ Զարուհի Փոստանջյանի ամուսնու ավտոմեքենան։

ՀՀ քննչական կոմիտեն հայտնում է, որ դեպքը տեղի է ունեցել օգոստոսի 4-ի ժամը 22:15-ից մինչև օգոստոսի 5-ի ժամը 04:00-ն ընկած ժամանակահատվածում։

«Առերևույթ հանցագործություն կատարած անձը հրկիզել է Կասյան փողոցի շենքերից մեկի բակում կայանված, հիշյալ շենքի բնակիչներից մեկին պատկանող «Մերսեդես-Բենց E-270» մակնիշի ավտոմեքենան: Կրակի հետևանքով ջերմահարվել է նաև հարևանությամբ կայանված «Միցուբիշի Պաջերո» մակնիշի ավտոմեքենան»,- նշված է Քննչական կոմիտեի հաղորդագրության մեջ։

Դեպքի առթիվ ՀՀ ոստիկանության Երևան քաղաքի վարչության Արաբկիրի բաժնում հարուցվել է քրեական գործ՝ ՀՀ քրեական օրենսգրքի 185-րդ հոդվածի 2-րդ մասի 1-ին և 2-րդ կետերով, այն է՝ կատարվել է հրկիզման, պայթյունի կամ հանրավտանգ այլ եղանակով և խոշոր չափերի վնաս է պատճառել։ Նախաքննություն կատարելու համար քրեական գործը ուղարկվել է ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժին:

Նշանակվել է դատաապրանքագիտական, դատահրդեհատեխնիկական և դատահետքաբանական համալիր փորձաքննություն: Հանձնարարություն է տրվել հետաքննության մարմնին: Կատարվում է նախաքննություն։

Նշենք, որ Զարուհի Փոստանջյանը մեզ հետ զրույցում նշել էր, որ ինքն ու ամուսինը անձնական թշնամիներ չունեն, սակայն համոզված է, որ դեպքն անմիջականորեն կապ ունի իր քաղաքական գործունեության հետ։