Հրդեհվել է Զարուհի Փոստանջյանի ամուսնու ավտոմեքենան․ նախկին պատգամավորը քաղաքական ենթատեքստ է տեսնում

Այս գիշեր՝ 03։30-ի սահմաններում հրդեհվել է «Երկիր Ծիրանի» կուսակցության նախագահ Զարուհի Փոստանջյանի ամուսնու ավտոմեքենան։

Ինչպես Factor.am-ի հետ զրույցում պատմեց նախկին պատգամավորը, ուշ գիշերին հարևաններն են պայթյունի ձայներ լսել, դուրս գալուց հետո տեսել են, որ մեքենան է այրվում:

«Մինչև մենք հասանք, մեքենայի դիմացի հատվածը գրեթե ամբողջությամբ վառված էր, վերածվել էր ջարդոնի։ Բոցը վնասել է նաև կողքի մեքենան, լավ է՝ մարդ չի եղել մեջը, զոհեր չենք ունեցել»,- պատմեց Փոստանջյանը։

Նրա պնդմամբ՝ իրենց ավտոմեքենան սարքին վիճակում է եղել, ուստի բացառում է ինքնաբռնկման վարկածը։

«Ոչ ես, ոչ ամուսինս անձնական թշնամիներ չունենք, բայց համոզված եմ՝ դեպքը կապ ունի քաղաքական իմ գործունեության հետ»,- նշեց Փոստանջյանը՝ խուսափելով անուններ հրապարակելուց։

«Մենք արդեն հաղորդում ենք ներկայացրել հանցագործության մասին, ցուցմունք ենք տվել, սպասենք հետագա զարգացումներին»,- ասաց նա։

Դեպքը տեղի է ունեցել Կասյան փողոցում, որտեղ անվտանգության տեսախցիկներ են եղել։ Չնայած դրան՝ նախկին պատգամավորի փոխանցմամբ՝ դեպքի վայրում աշխատող փորձագետներն իրեն հայտնել են, որ տեսախցիկը չի աշխատել և դեպքը չի արձանագրվել։

Ոստիկանությունից Factor.am-ի հարցին ի պատասխան նշեցին, որ պատահարի մասին ահազանգ են ստացել 04։55-ի սահմաններում, այս պահին՝ հանգամանքները պարզվում են։ Արտակարգ իրավիճակների նախարարությանից էլ հայտնում են, որ մանրամասների մասին տեղեկություն կտրվի միայն տասն օր անց, երբ ավարտվի փորձաքննությունը։

Ռոզա Վարդանյան