Ինչ էր անում մի քանի օր Զաքիր Հասանովը Արցախի գրավյալ Քարվաճառում ու Քաշաթաղում

Ադրբեջանի պաշտպանության նախարար Զաքիր Հասանովը մի քանի օր է, ինչ գտնվում էր Արցախի գրավյալ տարածքներում։ Տեղական լրատվամիջոցները՝ վկայակոչելով պաշտպանության նախարարությանը, պարբերաբար նրա այցերի մասին տեղեկատվություն են հաղորդում։ Հատկանշանական է, որ Հասանովի այցելության հիմնական կանգառներն Արցախի գրավյալ Քարվաճառի ու Քաշաթաղի շրջաններն են։ Ըստ երևույթին, սա պայմանավորված է նրանով, որ ադրբեջանական կողմը զորամասերի ու ենթակառուցվածքների կառուցման ակտիվ աշխատանքներ է տանում հենց այս շրջաններում։

Ի դեպ հետաքրքիր այն է, որ Արցախի գրավյալ տարածքներ այցելության նախօրեին Ադրբեջանի պաշպանության նախարարը օգոստոսի 2-ին Կենտրոնական հրամանատարական կետում ծառայողական խորհրդակցություն է անցկացրել, որին մասնակցել են պաշտպանության նախարարի տեղակալները, տարբեր զորքերի հրամանատարները, նախարարության գլխավոր վարչությունների, վարչությունների ու ծառայությունների պետերը, ինչպես նաև տեսակապով՝ Արցախի գրավյալ տարածքներում տեղակայված զորամիավորումների և միավորումների հրամանատարներն ու պաշտոնատար այլ անձինք։ Հասանովն իր այցը սկսել էր մի շարք նորաբաց զորամասեր այցով, որոնց գտնվելու կոնկրետ վայրերը, բնականաբար, չեն նշվում։

Այնուհետ նա այցելել է Քարավաճառ, որտեղ ծանոթացել է նոր կառուցվող ուսումնական զորավարժարանի շինաշխատանքներին։ Բացի այդ Հասանովը եղել է նաև Քարվաճառում տեղակայված զորամասերում։ Ադբեջանի ՊՆ հաղորդագության համաձայն՝ Հասանովը « Հայաստանի ԶՈՒ-ի ստորաբաժանումների դիմաց ՝3000 մետր բարձրության վրա գտնվող դիրքերում հանդիպել է մարտական հերթապահություն իրականացնող անձնակազմի հետ»։
Քարվաճառում ըստ Ադրբեջանի ՊՆ-ի՝ Հասանովը այցելել է նաև վերանորոգված զինվորական հոսպիտալ։ Արցախի գրավյալ Քաշաթաղի (Լաչինի) շրջանում ևս ադրբեջանցի նախարարը այցելել է զինվորական բժշկական կենտրոն։

Էմմա Չոբանյան