Հայաստանում թմրամոլների թիվն ավելացել է․ 10 տարվա ընթացքում 2956 թմրամոլ դատապարտվել է ազատազրկման

ԱՆ գլխավոր նարկոլոգ Պետրոս Սեմերջյանն այսօր ներկայացրել է վերջին երկու տարիներին Հայաստանում հաշվառված թմրամոլների թիվը, որը զգալիորեն աճել է։ Եթե 2016-ին հաշվառվել է 6010, ապա 2017-ին` 6544 թմրամոլ։

Նշենք, որ ըստ գլխավոր նարկոլոգի, Հայաստանը թմրամոլների թիվ-երկրի բնակչություն հարաբերակցությամբ զիջում է հարևան երկրներին՝ Իրանում կա 3,5 մլն, Վրաստանում՝ 400.000 թմրամոլ։

2008 թվականից մինչև 2018 թվականի հունվարի 1-ը, ըստ Հայաստանի դատախազության՝ Factor.am-ին տրամադրած տվյալների, Հայաստանում թմրամիջոցների ապօրինի շրջանառության հետ կապված հարուցվել է 6583 քրեական գործ, դատապարտվել է 4856 անձ, որից 2956-ը՝ ազատազրկման։

Ամենաշատ քրեական գործերը հարուցվել են անցած՝ 2017 թվականին՝ 856 գործ, դատապարտվել է 427 անձ, որից 158-ը՝ ազատազրկման։

Տասը տարիների վիճակագրության համաձայն՝ առավել մեծ թվով քրեական գործեր են հարուցվել 2014-ին՝ 751 քրեական գործ, 396 դապատարտված, 242 ազատազրկված անձ և 2010 թվականին՝ 756 քրեական գործ, 644 դատապարտված և 447 ազատազրկված անձ։ Ամենաքիչ քրեական գործերը հարուցվել են 2008 թվականին՝ 378 գործ, դատապարտվել է 355 անձ, ազատազրկվել 208-ը։

Նույն թվականին առգրավվել է ավելի քան 24 հազար գրամ թմրանյութ, գերիշխողը մարիխուանա տեսակի թմրանյութն է։ Թմրանյութի առգրավման քանակների վիճակագրությունն, ըստ ոստիկանության, հետևյալն է․ վերջին 10 տարիների ընթացքում ամենից շատ թմրանյութ է առգրավվել 2014 թվականին՝ 883,526 գրամ, առավելապես՝ հերոին տեսակի թմրանյութ։ Այս ցուցանիշը մեծ է եղել նաև 2011 թվականին, առգրավվել է 128,049 գրամ թմրամիջոց , մեծ մասը՝ դարձյալ հերոին։

Ոստիկանությունից նաև հետաքրքրվեցինք՝ ինչ գործողություններ են կատարվում ապօրինի շրջանառությունից հայտնաբերված և առգրավված թմրամիջոցների հետ։ Պարզվեց՝ թմրանյութերի հետագա ճակատագիրը իրենք չեն տնօրինում․ «Համապատասխան արձանագրություն կազմելուց և կնքելուց հետո, այն ուղարկվում է փորձաքննության, որից հետո որպես իրեղեն ապացույց հանձնվում է նախաքննական մարմնին»,- տեղեկացրեցին Ոստիկանությունից:

Լիլիթ Շաբոյան