19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Վրաստանը, Ուկրաինան և Մոլդովան վերահաստատել են ԵՄ-ին անդամակցելու իրենց ձգտումը
Քաղաքականություն
20.07.2021 | 16:45
Վրաստանի, Ուկրաինայի և Մոլդովայի ղեկավարները Բաթումիում կայացած խորհրդաժողովում համատեղ հուշագիր են ստորագրել, որով նրանք վերահաստատել են ԵՄ-ին անդամակցելու իրենց ձգտումը: Փաստաթղթի համաձայն՝ եվրոպական ընտանիքի մաս դառնալու հեռանկարը հանրապետություններին տալիս է հզոր խթան՝ ավելի խորը բարեփոխումներ իրականացնելու համար, գրում է Euronews-ը։
«Մեզ միավորում է անցյալին վերադառնալու ցանկության բացակայությունը: Մենք պատրաստ ենք և վճռական ենք պայքարել հանուն մեր եվրոպական ապագայի՝ մեր երկրներում բևեռացման սպառնալիքից և դրսից եկող սադրանքների ռիսկերից խուսափելու համար»,- ասել է Վրաստանի նախագահ Սալոմե Զուրաբիշվիլին:
Եվրոպական խորհրդի ղեկավար Շառլ Միշելը, որը նույնպես Բաթումիում է, նախանշել է հետագա համագործակցության հեռանկարները, սակայն չի անդրադարձել հանրապետությունների՝ ԵՄ անդամակցության հարցին:
«Եվրամիությունը կմնա ուժեղ և հուսալի գործընկեր ձեր տարածաշրջանի համար: Մենք հույս ենք դնում բարեփոխումները շարունակելու ձեր նվիրվածության վրա, և ոչ թե Բրյուսելի հավանությանն արժանանալու համար, այլ ի շահ ձեր ժողովուրդների և ձեր հասարակության»,- ասել է նա:
Ուկրաինան, Մոլդովան և Վրաստանը Արևելյան գործընկերության նախաձեռնության անդամներ են՝ ԵՄ-ի և հետխորհրդային երկրների միջև երկխոսություն զարգացնելու համար: Բաթումիում նրանց խոստացել են աննախադեպ ֆինանսական օգնություն Եվրոպայից՝ 2.3 միլիարդ եվրո:
Տաթև Ֆռանգյան
