30.10.2026 | 15:10
Կաթողիկոսի գործով նախկին դատավորի դեմ // «Օտարերկրյա գործակալ» «Նովայա գազետա»-ն փակվում է․ ԼՈՒՐԵՐ
Այս աբսուրդային քննարկումը ևս մեկ անգամ ցույց է տալիս Ադրբեջանի իրական մտադրությունները. Տաթևիկ Հայրապետյան
Քաղաքականություն
10.07.2021 | 16:32
Բազմիցս առիթ եմ ունեցել ասելու՝ միակողմանի խաղաղություն չի կարող կառուցվել, իսկ Ադրբեջանը բնավ չի ձգտում խաղաղության, ֆեյսբուքյան իր էջում գրել է ԱԺ «Իմ քայլը» խմբակցության պատգամավոր, ԵԽԽՎ հայաստանյան պատվիրակության անդամ Տաթևիկ Հայրապետյանը՝ անդրադառնալով Զանգեզուրի վերաբերյալ Ադրբեջանի խորհրդարանում ծավալված ակտիվ քննարկմանը։
Գրառումը ներկայացնում ենք ստորև․
«Երեկ Ադրբեջանի խորհրդարանում ակտիվ քննարկում է ծավալվել Հայաստանի Հանրապետության Սյունիքի շրջանի/Զանգեզուրի վերաբերյալ։ Ադրբեջանցի պատգամավորները իրենց հայտարարություններում ակնհայտ տարածքային հավակնություններ են ներկայացրել ՀՀ ինքնիշխան տարածքի նկատմամբ՝ բնորոշելով որպես «պատմական ադրբեջանական հող»։ «Մենք պահանջում ենք մեր պատմական հողերը և ճիշտ ենք անում, այդ տարածքները պետք է միացվեն Ադրբեջանին մոտ ապագայում»։
Այս անհեթեթ քննարկումը ավարտվել է Միլլի Մեջլիսի փոխխոսնակի խոսքով, որ «այս հարցը ոչ պակաս կարևոր է, քան Ղարաբաղի հարցը»։ Ադրբեջանի խորհրդարանում ծավալվող այս աբսուրդային քննարկումը ևս մեկ անգամ ցույց է տալիս Ադրբեջանի իրական մտադրությունները և տարածքային անթաքույց հավակնությունները ՀՀ ինքնիշխան տարածքի նկատմամբ։ Բազմիցս առիթ եմ ունեցել ասելու՝ միակողմանի խաղաղություն չի կարող կառուցվել, իսկ Ադրբեջանը բնավ չի ձգտում խաղաղության: Գործողությունները, հնչող հայտարարությունները և ծավալվող քննարկումները ևս մեկ անգամ ապացուցում են դա»։
Հիշեցնենք, որ Ադբեջանի նախագահ Իլհամ Ալիևը հրամանագիր է ստորագրել երկրի տնտեսական շրջանների նոր բաժանման մասին։ Տեղական լրատվամիջոցների հաղորդմամբ՝ նոր բաժանումը ենթադրում է 14 տնտեսական շրջաններ՝ նախկին 11-ի փոխարեն։ Տնտեսական շրջաններն են՝ Բաքվի, Նախիջևանի, Ապշերոն-խիզինի, Լեռնային Շիրվան, Գյանջա-Դաշքեսան, Ղարաբաղյան, Գազախ-Թովուզի, Գուբա-Խաչմազի, Լենքորան-Աստարայի, Կենտրոնական Արան, Միլ-Մուղանի, Շեքի-Զաքաթալայի, Արևելյան Զանգեզուրի, Շիրվան- Սալյանի։
