«Չպետք է հնձելով գնանք»․ Էդուարդ Շարմազանովը՝ համայնքների խոշորացման մասին

«Հայաստանի Հանրապետության վարչատարածքային բաժանման մասին» ՀՀ օրենքում փոփոխություններ կատարելու օրենքի նախագծի մասին արտահերթ ելույթով հանդես եկավ ԱԺ փոխնախագահ Էդուարդ Շարմազանովը՝ արձագանքելով Նիկոլ Փաշինյանի այն դիտարկմանը, թե պետք է արմատախիլ անել տեղային հայրենասիրությունը։

«Իհարկե, Հայաստանը մեկ աշխարհ է, մեկ ժողովուրդ է, Նոյեմբերյանից մինչև Ագարակ, Գյումրիից մինչև Տավուշ կապող մեր բոլոր հայրենակիցները ՀՀ քաղաքացիներ են և մեր քույրերն ու եղբայրներն են։ Սակայն, իմ խորին համոզմամբ, եթե ես Լոռու, Ալավերդու նկատմամբ ջանացավ չլինեմ, չեմ կարող Երևանի, Գյումրիի, Կապանի նկատմամբ ջանացավ լինեմ, եթե մարդն իր ընտանիքի, եղբոր համար ջանացավ չէ, չի կարող կողքի համայնքի համար ջանացավ լինել»,- հայտարարեց ՀՀԿ խոսնակը՝ հավելելով, որ սա չի նշանակում, թե պետք է միայն «տեղային հայրենասիրությամբ տոգորվել»։

Շարմազանովի խոսքով՝ ցանկացած ծայրահեղական գնահատական իր համար անընդունելի է։ ԱԺ փոխնախագահը հիշեցրեց, որ մեկ տարի առաջ խորհրդարանը համայնքների խոշորացման պիլոտային ծրագիր է ընդունել Լոռու մարզում։ «Հիմա պետք է նայենք՝ միացած համայնքի ժողովուրդը շահե՞լ է, թե՞ ոչ»,- ասաց նա՝ նկատելով, որ խոշորացումը պետք է բանականության սահմաններում լինի։

Դիմելով նախագծի հիմնական զեկուցող Վաչե Տերտերյանին, Շարմազանովը նկատեց, որ եթե փոխնախարարը կարող է հավաստիացնել, որ միավորված համայնքների բնակիչները խոշորացումից հետո շահել են, ապա իրենք պետք է կողմ քվեարկեն այս նախագծին։ Իշխող ուժի ներկայացուցիչը հայտարարեց՝ հարցը շատ զգայուն է «չպետք է հնձելով գնան»։

Սեդա Ղուկասյան