Ռիսկեր կան՝ ավելի կսրվի իրավիճակը ընտրություններից հետո․ Բորիս Նավասարդյան․ ՏԵՍԱՆՅՈՒԹ

Factor TV-ի հարցազրույցը Երևանի մամուլի ակումբի նախագահ Բորիս Նավասարդյանի հետ

-Հանգիստ չէ, կարծես թե, ընտրությունների ընթացքը, գրանցվել են կրակոցներ, կան ձերբակալություններ, խուզարկություններ, ընտրակաշառքների մասին հաղորդումներ ստացել է ինչպես Դատախազությունը, այնպես էլ Ոստիկանությունը։ Ձեզ համար անակնկա՞լ էր ընտրությունների այս ընթացքը։

-Ո՛չ, իհարկե՝ հաշվի առնելով այն լարվածությունը, որ կա պատերազմից հետո, մասնավորապես, նոյեմբերի 9-ից հետո, և կարելի էր ակնկալել, որ ընտրարշավը հանգիստ չի անցնելու և լինելու է բավականին թեժ, մանավանդ, որ մրցակցող քաղաքական ուժերը, կարծես թե, չբավարարվեցին այն աշխատանքով, որ կատարել էին քարոզարշավի ընթացքում և մինչ այդ ընկած ժամանակաշրջանում։ Եվ շարունակում են պայքարել ձայների համար նաև լռության օրվա և քվերակության օրվա ընթացքում։

-Հնարավո՞ր է՝ ընտրությունների արդյունքում մեր պետության զարգացման վեկտորը հետ շրջվի դեպի բռնապետություն։

-Երևի Ձեր հարցի պատասխանը ենթադրում է շատ ավելի մեծ խորություն, քան ես կարող եմ ինձ թույլ տալ։ Հաշվի առնելով, որ մենք գտնվում ենք քվեարկության փուլում, և շատ բաներ ասել չեմ կարող։ Ընդամենը կարող եմ ասել, որ այս ընտրությունները ոչ լավագույն, միգուցե, բայց անհրաժեշտ քայլ են՝ երկրում կայունություն, կառավարելիություն հաստատելու համար։ Անցած տարվա նոյեմբերի ճգնաժամի առաջացումից հետո կա՛մ խորրդարանը պետք է գտներ ճանապարհներ՝ ճգնաժամը հաղթահարելու, կա՛մ, եթե չի կարողանում դա անել որպես միակ առաջնային մանդատ ունեցող պետական կառույց, պետք է լինեին արտահերթ ընտրություններ։ Փաստորեն, մենք լավագույն լուծումը չգտանք, բայց գնում ենք անհրաժեշտ լուծման ճանապարհով։ Արդյո՞ք դա բավարար կլինի, որպեսզի մենք ունենանք հետագա զարգացում, և որևէ վերադարձ չլինի անցանկալի ռեժիմների։ Այդ հարցի հստակ պատասխանը չկա, շատ բաներ կախված են նրանից, թե ինչպես կանցնեն ընտրությունները, ոչ թե արդյունքների տեսակետից, այլ ընտրությունների որակի, և ինչպիսին կլինեն հետընտրական զարգացումները։ Դա խոսում է նրա մասին, որ մենք կարող ենք որոշակի քայլ կատարել դեպի կայունացում, ոչ թե վերջնական լուծումներ գտնենք, բայց կան նաև լուրջ ռիսկեր, որ իրավիճակն ավելի կսրվի ընտրություններից հետո։ Դրա համար մենք արդեն տեսնում ենք զարգացումներ, որոնք կարող են դեպի դա տանել։

Հարցազրույցն ամբողջությամբ՝ տեսանյութում։