11.10.2026 | 21:39
Երևան-Սևան ճանապարհին մեքենան գլորվել է 20 մետր խորությամբ ձորը
Ջո Բայդենի հիանալի շաբաթը Եվրոպայում ու ներամերիկյան օրակարգի խնդիրները․ Financial Times-ի անդրադարձը
Քաղաքականություն
18.06.2021 | 20:51
Ջո Բայդենը հիանալի շաբաթ անցկացրեց Եվրոպայում. նա ամրապնդեց հարաբերությունները G7-ի շրջանակում գործընկերների հետ, լուծեց ՆԱՏՕ-ի հետ Թրամփի օրոք ծագած հակամարտությունը և, իր խոսքով, կառուցողական զրույց ունեցավ Վլադիմիր Պուտինի հետ: Սակայն ներքին ամերիկյան օրակարգը փչացրեց նրա տուն վերադարձը, գրում է Financial Times-ը։
ԱՄՆ գերագույն դատարանը նախօրեին ուժի մեջ է թողել Obamacare առողջապահության մասին օրենքը, որը Բայդենը, որպես փոխնախագահ, Բարաք Օբամայի վարչակազմին օգնել էր մշակել։ Օրենքի չեղարկում էին ցանկանում հանրապետականները, բայց արդյունքը դեմոկրատներին ուրախանալու առիթ է տալիս։ Սակայն հենց այս ֆոնին էլ հարց է առաջանում՝ ո՞րն է լինելու Բայդենի ժառանգությունը՝ որպես նախագահ:
Նրա նախագահական ծրագիրը հագեցած էր ներքին օրակարգի այնպիսի հավակնոտ նախագծերով, որ նրան ակամայից սկսեցին համեմատել Ֆրանկլին Ռուզվելտի հետ:
Իշխանության ղեկին լինելու կես տարում նա արդեն նախաձեռնել է մի քանի բարեփոխումներ ու օրինագծեր, սակայն դրանք գրեթե բոլորը ճահճացել են Կոնգրեսում՝ ներառյալ ընտրական բարեփոխումները։ Բյուջեն խոշոր ձեռնարկություններից հարկերի բարձրացման հաշվին լցնելու՝ նրա վարչակազմի ծրագրերը նույնպես, կարծես, կասկածելի են։
Եվ ամենատխուրը Բայդենի համար այն է, որ իր ձախողումների մեջ նա չի կարող մեղադրել միայն հանրապետականներին, երբ նրա աշխատանքներն արգելակում են նաև որոշ կուսակիցներ, գրում է հրատարակչությունը։
Տաթև Ֆռանգյան
