Թող պարզ ասեն` Էջմիածնում շտաբ բացելու համար դուք մեղադրվում եք էսինչ հոդվածով. Սանասար Գաբրիելյան

«Իգլայի» գործով ամբաստանյալ Սանասար Գաբրիելյանն այսօր Վերաքննիչ քրեական դատարանում ընթացող նիստի ընթացքում մեկնաբանեց, թե ինչու է դատավորության ժամանակ իրեն անլուրջ պահում և հումորներ անում. «Հարգելի դատարան, ինձ միշտ ասում եք անլուրջ եմ վերաբերվում դատավարությանը: Բա ի՞նչ անեմ, ախր բերում են նենց հիմքեր, նենց մեղարդանքներ, բոլորս էլ գիտենք, որ բառերի միացումից ստացվում են նախադասություներ, որոնք էլ միացնում ես` ստացվում է «Գյուլնազ տատու հեքիաթ»: Թող պարզ ասեն՝ Էջմիածնում շտաբ բացելու համար դուք մեղադրվում եք էսինչ հոդվածով»:

Սանասար Գաբրիելյանը նշեց, որ ինքը Սամվել Բաբայանից միայն հետաքրքրվել է՝ արդյոք այդ զենքը բանակին պետք կգա՞, թե՞ ոչ: «Մեղադրողը վիզ դրած ուզում ա ապացուցի, որ դա եղել ա իմ պատվերը: Ուզո՞ւմ ես հերոսանաս, էն ա Ղարաբաղի կռիվը սկսում ա, գնա ընդեղ հերոսացի: Հարգելի մեղադրող, ինչի՞ ես սարքում, կարո՞ղ ա դու էս ազգի համար ինձնից շատ բան ունես արած»,- հարց ուղղեց Սանասարյանը:

Ամբաստանյալն իր խոսքում Բաբայանին անընդհատ ազգի հերոս ու «կամանդույուշիյ» էր անվանում, նա, դիմելով դատարանին, ասաց. «Ես մի անգամ, ընկերոջս դիմելով, Սամո ասացի, դուք ինձ ասացիք՝ Սամո չի, Սամվել Բաբայան է, հիմա տեսնենք ո՞նց եք դուք դատելու էդ մարդուն»:

Երբ մեղադրողը սկսեց իր ճառն ընթերցել Գաբրիելյանն ասաց, որ չի ցանկանում լսել նրան, ցանկանում է լքել դահլիճը. «Որ սկսեց խոսել՝ սիրտս վատացավ: Ճնշումս բարձրացավ»:

Դատարանը որոշեց նիստը կես ժամով ընդմիջել, որպեսզի Գաբրիելյանի համար շտապօգնության բրիգադ ժամանի:

Լիլիթ Շաբոյան