31.07.2026 | 17:45
Պետությանը հանձնվել է Ծառուկյանի «Արարատ» կոնյակի կոմբինատի բաժնետոմսերի կառավարումը
Ադրբեջանում ԱԳՆ-ից պահանջում են ԵԱՀԿ Մինսկի խմբի համանախագահության լուծարման քայլեր ձեռնարկել
Քաղաքականություն
08.06.2021 | 15:59
Ադրբեջանի խորհրդարանի նիստում պատգամավորները հակահայկական հայտարարություններով են հանդես եկել և նույնիսկ խոսել ԵԱՀԿ Մինսկի խմբի համանախագահության ինստիտուտի լուծարման անհրաժեշտության մասին։ Մասնավորապես, պատգամավոր Ժալյա Ալիևան, ադրբեջանական թեզերին համահունչ, հայկական կողմի հասցեին մեղադրանքներ է հնչեցրել՝ նշելով, որ «նախորդ շաբաթ ամբողջ աշխարհի աչքի առաջ հայկական վանդալիզմ է տեղի ունեցել և երկու լրագրողներ շեհիդներ են դարձել»։
Մեկ այլ պատգամավոր՝ Ֆազայիլ Աղամլին էլ նշել է, որ Ադրբեջանի ԱԳՆ-ն պետք է դիմի ԵԱՀԿ Մինսկի խմբին՝ համանախագահության ինստիտուտի լուծարման պահանջով։ Նա նշել է, որ Ֆրանսիան լռություն է պահպանում վերջին իրադարձությունների վերաբերյալ։
«Միսկի խումբը կրկին լռեց՝ չցուցադրելով իր դիրքորոշումը։ Ադրբեջանի ԱԳՆ-ն պարտավոր է բարձրացնել համանախագահության ինստիտուտի լուծարման հարցը»,- ասել է պատգամավորը։
Բաքուն պարբերաբար դժգոհում է Մինսկի խմբի համանախագահների գործունեությունից և փորձում ամեն ինչ անել՝ Լեռնային Ղարաբաղի հակամարտության կարգավորման բանակցությունները Միսկի խմբի ձևաչափից դուրս մղելու համար։ Հիմնական մեղադրանքներն էլ գրեթե միշտ հնչում են Ֆրանսիայի հասցեին։
Մասնավորապես, օրերս Մեջլիսի միջազգային հարաբերությունների և միջխորհրդարանական կապերի հանձնաժողովի անդամ Նասիբ Մեգամալիևը, մեկնաբանելով Ֆրանսիայի նախագահ Էմանուել Մակրոնի՝ «Ադրբեջանական ուժերը պետք է լքեն ՀՀ սուվերեն տարածքը» հայտարարությունը, ասել է, որ այն օբյեկտիվ չէ և իրականությանը չի համապատասխանում։ Նա Մակրոնին խորհուրդ է տվել նման հայտարարություններ անելուց առաջ հիմնվել «պաշտոնական փաստաթղթերի, ներառյալ՝ ֆրանսիական 18-րդ դարի քարտեզների վրա»։
«Բացի այդ, վերջերս Ֆրանսիայի խորհրդարանը միաձայն ընդունել էր «ղարաբաղյան անջատողականներին» սատարելու մասին օրենք։ Այսպիսով, Ֆրանսիան միանշանակ ձախողել է իր առաքելությունը որպես համանախագահ երկիր, և եկել է ժամանակը՝ այն փոխարինելու այլընտրանքով»,- ասել է պատգամավորը։
Միլլի Մեջլիսի միջազգային հարաբերությունների ու միջխորհրդարանական կապերի հանձնաժողովի մեկ այլ անդամ Սևինջ Ֆաթալիևան էլ ասել է, թե Մակրոնի հայտարարությունները հայ-ադրբեջանական սահմանային իրավիճակի վերաբերյալ կողմնակալ են։
«Անկախ նրանից՝ ինչ են խոսում ֆրանսիացի պաշտոնյաները, Ադրբեջանը վերականգնել է իր տարածքային ամբողջականությունը։ Այդպիսի հայտարարությունները միայն խարխլում են Ֆրանսիայի նկատմամբ ադրբեջանցի ժողովրդի վստահությունը՝ որպես համանախագահ երկրի։ Արդյունքում, մեր հասարակությունն արդարացիորեն պահանջում է Ֆրանսիային հեռացնել ԵԱՀԿ Մինսկի խմբի համանախագահների գործունեությունից»,- ասել է Սևինջ Ֆաթալիևան։
Հիշեցնենք, որ մինչ Ադրբեջանում պահանջում են Ֆրանսիային հեռացնել Մինսկի խմբի համանախագահությունից, նախօրեին տեղի է ունեցել Ֆրանսիայի, ՌԴ ու Գերմանիայի ԱԳ նախարարների հեռախոսազրույցը, որի ընթացքում քննարկվել է նաև հայ-ադրբեջանական սահմանային իրավիճակն ու ԼՂ հակամարտությունը։ Նախարարները վերահաստատել են ԵԱՀԿ Մինսկի խմբի համանախագահների դերակատարումը Հայաստանի ու Ադրբեջանի միջև բանակցային գործընթացում։
Էմմա Չոբանյան
