14.09.2026 | 19:54
Մայր Աթոռը դատապարտել է Գանձասարի և Դադիվանքի հայկական ինքնությունը խեղաթյուրելու Հաջիևի փորձերը
Բայրամովն ու Հարավային Կովկասում ԵՄ ներկայացուցիչը քննարկել են հայ-ադրբեջանական սահմանային լարվածությունը
Քաղաքականություն
01.06.2021 | 13:17
Ադրբեջանի ԱԳ նախարար Ջեյհուն Բայրամովը հեռախոսազրույց է ունեցել Հարավային Կովկասում ԵՄ հատուկ ներկայացուցիչ Տոյվո Կլաարի հետ։ Այս մասին հաղորդում են ադրբեջանական լրատվամիջոցները՝ վկայակոչելով երկրի արտաքին քաղաքական գերատեսչությանը։
«Զրույցի ընթացքում կողմերը քննարկել են տարածաշրջանում առկա իրավիճակը, Լեռնային Ղարաբաղի վերաբերյալ եռակողմ համաձայնության իրականացումը, այդ թվում՝ կարծիքներ են փոխանակել հայ-ադրբեջանական սահմանի լարվածության վերաբերյալ»,- ասվում է Ադրբեջանի ԱԳՆ հայտարարության մեջ։
Անդրադառնալով ՀՀ սուվերեն տարածքում 6 հայ զինծառայողների գերեվարմանը՝ Բայրամովը կրկին ադրբեջանական թեզերն է հնչեցրել ու նշել, որ «հայկական կողմի սադրանքներն անընդունելի են»։ Նա նշել է, որ ցանկացած տարաձայնություն, այդ թվում՝ սահմանային հարցերը, պետք է լուծել բանակցությունների միջոցով։
Բայրամովը նաև ասել է, թե Ադրբեջանը սատարում է հայ-ադրբեջանական սահմանի դելիմիտացիայի ու դեմարկացիայի եռակողմ հանձնաժողովի ստեղծման առաջարկը։
Էմմա Չոբանյան
