Լուկաշենկոն կարծում է, որ իր երկիրը կանգնած է «սառցե» պատերազմի շեմին

Բելառուսի նախագահ Ալեքսանդր Լուկաշենկոն կարծում է, որ իր երկիրը կանգնած է «սառցե» պատերազմի շեմին: Վերջինս նման հայտարարություն է արել չորեքշաբթի օրը՝ ելույթ ունենալով խորհրդարանում խորհրդարանականների, Սահմանադրական հանձնաժողովի անդամների և պետական կառավարման մարմինների ներկայացուցիչների հետ հանդիպման ժամանակ:

«Մենք պետք է պահպանենք մեր երկիրը և այն փոխանցենք մեր երեխաներին նորմալ վիճակում: Ժամանակն է մեզ ընտրել: Մենք հայտնվեցինք նոր, ոչ թե սառը, այլ արդեն սառցե պատերազմի առաջնագծում: Եվ այն պետությունը, որը չի ենթարկվի հիբրիդային ճնշմանը , կկարողանա գոյատևել », – ասել է Լուկաշենկոն, հայտնում է «Բելտա» գործակալությունը:

«Ես դիմում եմ ամբողջ համաշխարհային հանրությանը. Բելառուսը ցնցելն իմաստ չունի», – հավելել է Լուկաշենկոն:

Հիշեցնենք՝ մայիսի 23-ին Աթենքից Վիլնյուս թռչող Ryanair ընկերության ինքնաթիռը հարկադիր վայրէջք էր կատարել Մինսկում։ Օդաչուներին տեղեկացրել էին օդանավում տեղադրված ռումբի մասին և նրանց խորհուրդ էին տվել վայրէջք կատարել Մինսկում։ Բելառուսը Միգ -29 կործանիչ էր բարձրացրել երկինք՝ ինքնաթիռը ուղեկցելու համար: Ինքնաթիռի վայրէջքից հետո բերման էր ենթարկվել ընդդիմադիր Ռոման Պրոտասևիչը՝ NEXTA-ի նախկին գլխավոր խմբագիրը։ Իսկ օդանավում ոչ մի ռումբ չէր հայտնաբերվել: Պրոտասևիչը, նրա ընկերուհին՝ Ռուսաստանի քաղաքացի Սոֆյա Սապեգան և մի քանի այլ անձինք չէին հասել Վիլնյուս:

Տաթև Ֆռանգյան