Քաղաքականություն
14.05.2021 | 17:41
Ադրբեջանի պաշտպանության նախարար Զաքիր Հասանովն այցելել է Արցախի գրավյալ տարածքներում տեղակայված հակաօդային պաշտպանության ուժերի ստորաբաժանումներից մեկը։ Այս մասին հաղորդում են տեղական լրատվամիջոցները։ Չի նշվում, սակայն, թե որ շրջանում է եղել Հասանովը։
Տարածված հաղորդագրության մեջ ասվում է, որ Ադրբեջանի ՊՆ ղեկավարը ծանոթացել է անձնակազմի համար ստեղծված պայմաններին, ուսումնասիրել բազմաֆունկցիոնալ ռադիոլոկացիոն կայանները, հրթիռային կայաններն ու այլ միջոցներ։ Զաքիր Հասանովը նաև համապատասխան հանձնարարականներ է տվել մարտունակության բարձր մակարդակի պահպանման, օդային տարածքի ավելի հուսալի պաշտպանության, մարտական հերթապահության որակյալ կազմակերպման ու վարման հետ կապված։
Հասանովն այցելել է նաև Արցախի գրավյալ տարածքներում գտնվող այլ զորամասեր։ Նոր զորամասերի դիտարկման ժամանակ նրան զեկուցվել է, որ ծառայողական ու մարտական գործունեության կազմակերպման, ինչպես նաև անձնակազմի համար կենցաղային պայմանների ապահովման համար տարբեր ուղղություններում մինչ օրս 20 զորամաս է շահագործման հանձվել։
Հիշեցնենք նաև, որ Ադրբեջանի բանակը մայիսի 16-ից նոր մասշտաբային զորավարժություններ է անցկացնելու՝ տարբեր զորատեսակների ներգրավմամբ։ Զորավարժություններին մասնակցելու է 15․000 զինծառայող, 300 միավոր տանկ ու այլ զրահամեքենաներ, տարբեր տրամաչափի մինչև 400 հրթիռահրետանային համակարգեր, հրթիռային բազմակի համակարգեր, ականանետեր ու համատանկային միջոցներ, մինչև 50 միավոր ռազմական ավիացիա ու տարբեր նշանակության անօդաչու թռչող սարքեր։
Էմմա Չոբանյան
