Հասարակություն
19.02.2018 | 20:43
ՀԺԿ համակիր Գրիշա Վիրաբյանը հայտարարել է, որ ԱԺ պատգամավոր Գևորգ Կոստանյանի և փաստաբան Արտակ Զեյնալյանի կողմից իրեն կաշառք է առաջարկվել, ինչի վերաբերյալ դիմում է ներկայացրել ՀՀ Քննչական կոմիտե եւ ԱԱԾ:
«Փաստինֆո»-ի հարցմանն ի պատասխան Քննչական կոմիտեից հայտնեցին, որ Գրիշա Վիրաբյանի կողմից դիմում ստացվել է Քննչական կոմիտե և այն ուղարկվել է ըստ ենթակայության՝ Հատուկ քննչական ծառայություն:
Նշենք, որ ըստ Վիրաբյանի հայտարարության՝ դեռևս 2004 թվականին իրեն խոշտանգելու փաստը Մարդու իրավունքների եվրոպական դատարանը հաստատված է համարել և պարտավորեցրել է ՀՀ իրավապահ մարմիններին քրեական գործ հարուցել և մեղավորներին պատասխանատվության ենթարկել, սակայն հարուցված քրեական գործերը կարճվել են:
1in.am-Ին Վիրաբյանը նաև հայտնել է, որ իր բոլոր միջնորդությունները՝ նորից փորձաքննություն նշանակելու վերաբերյալ և այլն, մերժվել են։ Նրանք ոչ մի գործ էլ չեն արել և ամեն ինչ թողել են դատարանի վրա։ Մերժել են նաև Երևանի նախկին ոստիկանապետ Աշոտ Կարապետյանի հետ առերեսման միջնորդությունը։ Մերժվել են նաև այլ միջնորդություններ՝ պաշտոնատար անձանց հարցաքննելու վերաբերյալ:
Վիրաբյանը լրատվամիջոցին հայտնել է. «Սա Գևորգ Կոստանյանի ձեռագիրն է։ Եվ ինքը պատրաստվում է Կոստանյան Գևորգին և Արտակ Զեյնալյանին դատի տալ՝ իրեն կաշառք առաջարկելու համար։
«Ես բոլոր փաստերն ունեմ, ապացույցները ունեմ»,- ասել էր նա:
Գրիշա Վիրաբյանը հայտարարել էր նաև, որ ԱԺ պատգամավոր, նախկին Գլխավոր դատախազ և ՄԻԵԴ-ում ՀՀ կառավարության ներկայացուցիչ Գևորգ Կոստանյանը և իր՝ արդեն նախկին փաստաբան Արտակ Զեյնալյանն իրեն հանդիպման են կանչել, և այդ հանդիպման ժամանակ Կոստանյանը Վիրաբյանին առաջարկել է որոշակի գումարի դիմաց հրաժարվել ՄԻԵԴ որոշումից բխող մնացած քայլերից, քրեական գործից։ Վիրաբյանը, սակայն, իր խոսքով, մերժել էր Կոստանյանի առաջարկը։
