Փոխհրաձգություն տաջիկ-ղրղզական սահմանին. երկու կողմից կան վիրավորներ․ Ժապարովը անվտանգության խորհրդի նիստ է անցկացրել

Ղրղզստանի նախագահ Սադիր Ժապարովն այսօր նեղ կազմով երկրի Անվտանգության խորհրդի նիստ է անցկացրել, որի արդյունքներով հանձնարարվել է կարգավորել իրավիճակը Տաջիկստանի հետ սահմանին: Այս մասին հայտնում է Ղրղզստանի Հանրապետության ղեկավարի մամուլի ծառայությունը, գրում է ՏԱՍՍ-ը:

«Ղրղզստանի Հանրապետության նախագահ Սադիր Ժապարովը նեղ կազմով Անվտանգության խորհրդի նիստ է անցկացրել։ Նախագահը նշել է, որ ներգրավված բոլոր պետական մարմինները պետք է ձեռնարկեն անհրաժեշտ միջոցներ իրավիճակի խաղաղ կարգավորման համար», – ասված է հաղորդագրության մեջ:

ՌԻԱ Նովոստին էլ հայտնում է, որ երկու կողմերի միջև փոխհրաձգություն է սկսվել։ «Նախնական տեղեկությունների համաձայն՝ տաջիկական կողմը ականանետային ստորաբաժանումների դիրքեր է տեղակայում»,- հավելել է գործակալության զրուցակիցը։

Հիշեցնենք՝ այսօր ավելի վաղ տեղեկություններ հայտնվեցին, որ Ղրղզստանի և Տաջիկստանի սահմանին գրանցված կրակոցների հետևանքով վիրավորվել է Ղրղզստանի Հանրապետության 30-ամյա քաղաքացի։ Գնդակը դիպել էր նրա աջ աչքին: Այս մասին Facebook- ում հայտնել է Բատկենի նահանգի ոստիկանության բաժանմունքի մամուլի քարտուղար Դամիրա Յուսուպովան, գրում է Sputnik-ի ղրղզական ծառաոթյունը:

Նշվում է, որ ապրիլի 29-ին `առավոտյան 5: 45-ին, Տաջիկստանի Հանրապետության քաղաքացիները հրազենից կրակ են բացել Կոկ-Տաշ գյուղում գտնվող Ղրղզստանի Հանրապետության զորամասի ուղղությամբ: Դրանից հետո տաջիկները սկսել են քարեր նետել Օշ-Իսֆանա մայրուղով անցնող ղրղզական մեքենաների վրա: Քրեական գործ է հարուցվել Ղրղզստանի Հանրապետության Քրեական օրենսգրքի 266 հոդվածով ՝ «Խուլիգանություն»:

Բանն այն է, որ ապրիլի 28-ին Տաջիկստանի քաղաքացիները շեբեն են բեռնել Ակ-Սու գետի ափից՝  պետական ​​սահմանային գծից 3-4 մետր հեռավորության վրա: Ինչից հետո տաջիկական կողմը որոշել է անվտանգության տեսախցիկներ տեղադրել «Գոլովնոյ ջրբաժանի» հատվածում։  Սահմանի երկու կողմից հավաքվել են մոտ 100-150 մարդ, նրանք սկսել են քարեր նետել միմյանց վրա: Երեկոյան իրավիճակը կայունացել էր.  բանակցություններ էին վարվում, և տաջիկական կողմը համաձայնվել է ապամոնտաժել տեսախցիկները, բայց խոստումն այդպես էլ  չի կատարել:

Ապրիլի 29-ի առավոտյան իրավիճակը վատթարացել էր: Տաջիկները սկսել են քարեր նետել ղրղզստանցիների և նրանց տների վրա: Դրանից հետո Տաջիկստանի Հանրապետության քաղաքացիները որսորդական հրացաններից սկսել էին կրակել Ղրղզստանի Հանրապետության քաղաքացիների անցնող մեքենաների վրա: Կան վիրավորներ: Իրավիճակը բնութագրվում է որպես լարված: Բատկենի նահանգի երեք բնակավայրերում արտակարգ իրավիճակ է մտցվել:

Տաջիկստանի Հանրապետության ազգային անվտանգության պետական ​​կոմիտեի սահմանապահ զորքերի մամուլի կենտրոնը հաղորդագրություն է տարածել այն մասին, որ միջադեպի հետևանքով վիրավորվել է յոթ տաջիկ: Ըստ տաջիկական կողմի ՝ «Գոլովնոյ ջրբաժանը» տեղակայված է Տաջիկստանի Հանրապետության տարածքում, իսկ Ղրղզստանն այն օգտագործում է միակողմանիորեն:

Մանրամասները՝ տեսանյութում:

Տաթև Ֆռանգյան