11.10.2026 | 21:39
Երևան-Սևան ճանապարհին մեքենան գլորվել է 20 մետր խորությամբ ձորը
ԱՄՆ Պետդեպարտամենտը Աֆղանստանում գտնվող իր որոշ աշխատակիցների կարգադրել է լքել երկիրը
Քաղաքականություն
27.04.2021 | 22:06
Աֆղանստանում ԱՄՆ դեսպանության աշխատակազմի մի մասը պետք է լքի երկիրը: Այս հրամանը տրվել է ԱՄՆ Պետդեպարտամենտի կողմից՝ Աֆղանստանից ամերիկացի զինվորականների դուրսբերման ֆոնին, գրում է Կոմերսանտը:
«ԱՄՆ Պետդեպարտամենտը կարգադրել է պետական պաշտոնյաներին հեռանալ Քաբուլում ԱՄՆ դեսպանատնից, որոնց գործառույթները կարող են իրականացվել այլ վայրերում»,- ասված է գերատեսչության հայտարարության մեջ:
Թե քանի ամերիկացի աշխատողի մասին է խոսքը, Պետդեպարտամենտը չի հստակեցրել:
Բացի այդ՝ ԱՄՆ Պետդեպարտամենտն Աֆղանստանում գտնվող ամերիկացի քաղաքացիներին առաջարկել է հնարավորինս շուտ լքել երկիրը: ԱԳ նախարարության կայքում Աֆղանստանը նշված է այն երկրների կատեգորիայում, ուր ճանապարհորդել խորհուրդ չի տրվում՝ անկայուն իրավիճակի պատճառով:
«Ահաբեկչական և ապստամբ խմբավորումները շարունակում են պլանավորել և հարձակումներ իրականացնել Աֆղանստանում: Այս հարձակումները տեղի են ունենում առանց նախազգուշացման և ուղղված են Աֆղանստանի ու ԱՄՆ կառավարությունների, տեղական ինքնակառավարման մարմինների շենքերի, օտարերկրյա դեսպանատների, ռազմական օբյեկտների, առևտրային ձեռնարկությունների աղոթատեղիների, ռեստորանների, հյուրանոցների օբյեկտների դեմ», – ասված է հայտարարության մեջ:
Հիշեցնենք, որ մայիսի 1-ից կսկսվի Աֆղանստանից ամերիկյան զորախմբի մասշտաբային դուրսբերումը: Այն պետք է ավարտվի մինչ 2021 թվականի սեպտեմբերի 11-ը: Սեպտեմբերի 11-ից հետո Քաբուլում ԱՄՆ դեսպանատունը հսկելու համար երկրում կմնա միայն սահմանափակ թվով զորակազմ: Որոշ հենակետերից զինվորականների տարհանումը սկսվել է ապրիլի վերջին: Այժմ երկրում կա շուրջ 2500 ԱՄՆ ռազմական անձնակազմ:
