17.09.2026 | 10:29
Արտարժույթների փոխարժեքները՝ սեպտեմբերի 17-ի դրությամբ
Քովիդ-19-ն այսօր աննախադեպ վտանգ է ամբողջ աշխարհի համար
Քաղաքականություն
20.04.2021 | 22:30
Աշխարհը քովիդ-19 հիվանդության տարածումը կզսպի եկող մի քանի ամիսների ընթացքում։ Ամերիկայի ձայնի հաղորդմամբ՝ այս մասին հայտարարարել է Առողջապահության համաշխարհային կազմակերպությունը՝ հավելելով, որ դա կարող է տեղի ունենալ, եթե պատվաստանյութի կիրառումը բաշխվի հավասարապես: Սակայն ոմանք պնդում են, որ եթե բարձր եկամուտ ունեցող երկրներում յուրաքանչյուր չորս քաղաքացուց մեկը ստացել է պատվաստանյութ, ապա աղքատ որոշ երկրներում պատվաստման է ենթարկվել միջին հաշվով 500-ից մեկը:
Կազմակերպության գործադիր տնօրեն Թեդրոս Գեբերյեսուսը նաեւ մտահոգություն է հայտնել ավելի երիտասարդների շրջանում հիվանդության տարածման ներկա արագ ընթացքի կապակցությամբ: Խոսքը 25-59 տարեկան անձանց մասին է, ասել է նա:
ԱՀԿ-ի համաճարակաբան Մարիա վան Քերքհովեն նույնպես խորը մտահոգություն է հայտնում նախկինում ավելի քիչ խոցելի տարիքային շերտում հիվանդության վերջերս արագ տարածվելու հանգամանքի կապակցությամբ: Նրա խոսքերով, միայն անցյալ շաբաթվա ընթացքում աշխարհում գրանցվել է եւս 5 միլիոն 200 հազար նոր դեպք, ինչը համավարակը սկսվելուց ի վեր մեկ շաբաթվա կտրվածքով ամենաբարձր ցուցանիշն է:
Այլ հաղորդագրությունների համաձայն, Եվրոպական միության առողջապահության մարմինը հայտնել է, թե իրոք ուղիղ կապ է տեսնում Johnson & Johnson պատվաստանյութի եւ արյան խցանումների միջեւ: ԱՄՆ-ի գլխավոր համաճարակաբան Էնթոնի Ֆաուչին էլ ասել է, թե Դեղամիջոցների վարչությունն ուրբաթ օրը նորից զբաղվելու է այս պատվաստանյութի արտոնության խնդրով: Իսկ երկրի արտգործնախարարությունը հայտարարում է ճամփորդությունների մասին նոր ուղեցույցով հանդես գալու մտադրությամբ, որը հորդորում է ամերիկացիներին մնալ տներում, երբ համավարակը շարունակում է հանդիսանալ աննախադեպ վտանգ ամբողջ աշխարհում:
