11.10.2026 | 20:00
15 հազար մարդ Հայաստան է գալիս․ ի՞նչ է սպասվում COP17-ում․ բնությունը մարդուց պաշտպանելու ՇԵՐՏԵՐԸ
Թուրքիայում Հայոց ցեղասպանությունը ժխտող միջազգային գիտաժողով է անցկացվել
Քաղաքականություն
20.04.2021 | 19:20
Թուրքիայում այսօր, երկրի նախագահի գրասենյակի համակարգմամբ, Հայոց ցեղասպանությունը ժխտող առցանց միջազգային գիտաժողով է անցկացվել։ Էրդողանի աշխատակազմի հանրային կապերի բաժնի ղեկավար Ֆահրեթթին Ալթունն իր ելույթում հայտարարել է, թե «պատմական իրադարձությունների քաղաքականացումն ու խեղաթյուրումն անընդունելի է», հաղորդում է «Անադոլու» գործակալությունը։
Թուրքիայի նախագահի աշխատակազմի ներկայացուցիչը նաև ասել է, որ «Առաջին համաշխարհային պատերազմի ընթացքում տեղի ունեցած իրադարձությունները լի են ողբերգական էջերով», իսկ որոշ շրջանակներ էլ փորձում են օգտագործել 1915 թվականի Օսմանյան կայսրության իրադարձությունները իմպերիալիստական նպատակներն առաջ տանելու գործիք։
«Առանձին երկրների խորհրդարանների որոշումները, որոնք հիմնված են այս կամ այն պատմական իրադարձությունների կանխակալ գնահատականի վրա, իհարկե, չեն կարող համարվել ժողովրդավարության ցուցանիշ։ Դա զուտ Անկարայի վրա ճնշման կուրսի մի մասն է»,- ասել է նա։
Ալթունը նաև նշել է, որ նման դիրքորոշումն «ամենամեծ անարգանքն է բոլոր նրանց հիշատակին, որոնք այն ժամանակ զրկանքներ են կրել»։
«Թուրքիան շարունակում է հանդես գալ արդարության հաղթանակի համար։ Դա վերաբերվում է ոչ միայն ժամանակակից գործընթացներին, այլև պատմական իրողություններին։ Դրա վառ ապացույցը նախագահ Ռեջեփ Թայիփ Էրդողանի կոչն է՝ 1915թ․ իրադարձությունների վերաբերյալ գիտական համատեղ հանձնաժողովի ստեղծման մասին։ Էրդողանի կոչը թուրքական կողմի՝ արդարությանը հասնելու իրական ձգտման ցուցիչն է»,- ասել է նա։
Նա հայտարարել է, թե «Հայոց ցեղասպանության մասին սուտը» կապ չունի Օսմանյան կայսրության պատմական իրողությունների հետ։
Էմմա Չոբանյան
