16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Իրանը ծրագրում է սկսել ուրանի մինչեւ 60 տոկոսի հարստացման աշխատանքներ
Քաղաքականություն
13.04.2021 | 22:26
Քանի դեռ ԱՄՆ-ը ու Իրանը նախապատրաստվում են միջուկային հարցերով Վիեննայում այս շաբաթ անցկացվելիք բանակցությունների երկրորդ փուլին, որոշ փորձագետներ կարծում են, որ Իրանի Նաթանզի միջուկային կայանում տեղի ունեցած սադրանքը կարող է վնասել բանակցությունների ընթացքը, գրում է Ամերիկայի Ձայնը:
Սպիտակ տան խոսնակ Ջեն Փսաքին հույս է հայտնել, որ Իրանի հետ Ավստրիայի մայրաքաղաքում չորեքշաբթի օրը նախատեսված անուղղակի բանակցությունները տեղի կունենան:
«Միացյալ Նահանգները որեւէ կերպ չի մասնակցել Նաթանզի ուրանի հարստացման կայանում տեղի ունեցածին, եւ ոչինչ չենք կարող ավելացնել այդ գործողության վերաբերյալ մեկնաբանություններին», ասել է նա ու ավելացրել, թե իրենք չեն ակնկալում, որ բանակցությունները կլինեն դյուրին:
Հիշեցնենք, որ կողմերի միջեւ անուղղակի բանակցությունների առաջին փուլն անցկացվել էր ապրիլի 6-9-ը, որի ժամանակ միջնորդի դերով էին հանդես գալիս Մեծ Բրիտանիան, Ֆրանսիան, Գերմանիան, Չինաստանն ու Ռուսաստանը:
Նման բանակցությունների միջոցով ԱՄՆ-ն և Իրանը փորձում են վերադառնալ դեպի 2015 թվականին կնքված միջուկային միջազգային գործարքը, ըստ որի Իրանը համաձայնվել էր չափավորել միջուկային զենք ստեղծելու ունակ աշխատանքները, ինչի դիմաց ԱՄՆ-ը ու աշխարհի գերհզոր մյուս պետությունները մեղմացրել էին Թեհրանի նկատմամբ պատժամիջոցները:
Սակայն այս պայմանագրից ԱՄՆ-ը միակողմանի կերպով 2018 թվականին դուրս է բերել նախկին նախագահ Դոնալդ Թրամփը, որից հետո մեկ տարի անց Իրանը սկսեց խախտել միջուկային գործողությունների համար իրեն տրված սահմանները:
Իրանը հանդես չի եկել Նաթանզի աշխատանքներում գրանցված խաթարման պատճառով Վիեննայում նախատեսված հանդիպման ձեւաչափը փոփոխության ենթարկելու մասին որեւէ հայտարարությամբ: Այն կատարվածի համար մեղադրում է Իսրայելին: Արտգործանախարար Մոհամեդ Ջավադ Զարիֆի խոսքերով, Իսրայելը դիվերսիա է իրականացրել, որի արդյունքում միջուկային կայանում անջատվել է էլեկտրասնուցումը: Նա այդ գործողությունն անվանել է «միջուկային ահաբեկչություն»:
Իրանը ծրագրում է սկսել ուրանի մինչեւ 60 տոկոսի հարստացման աշխատանքներ: Այս մասին հայտարարել է Իրանի արտգործնախարարը, դրա հիմք համարելով իր երկրի դեմ իրականացված «դիվերսիան»:
Իսրայելն այս առնչությամբ դեռեւս հանդես չի եկել որեւէ մեկնաբանությամբ:
