27.04.2026 | 22:58
Պուտինը «Ռոսսոտրուդնիչեստվո»-ի ղեկավար է նշանակել ՌԴ նախկին գլխավոր դատախազի որդուն՝ Իգոր Չայկային
ԱԺ պատգամավորները ԿԽՄԿ ներկայացուցիչների հետ քննարկել են անհետ կորածների կարգավիճակը կանոնակարգող օրենսդրությանը վերաբերող հարցեր
Քաղաքականություն
31.03.2021 | 19:11
ՀՀ ԱԺ «Իմ քայլը» խմբակցության պատգամավորներ Նազելի Բաղդասարյանը, Արուսյակ Ջուլհակյանը և Տաթևիկ Գասպարյանը մարտի 31-ին հանդիպել են Հայաստանում Կարմիր խաչի միջազգային կոմիտեի պատվիրակության հետ, հայտնում են ԱԺ լրատվական ծառայությունից։
Քննարկվել են անհետ կորած անձանց կարգավիճակը կարգավորող օրենսդրությանը, մասնավորապես՝ «Անհայտ կորած անձանց մասին» օրենքի ընդունմանը վերաբերող հարցեր: Նազելի Բաղդասարյանը հյուրերին նախ ներկայացրել է այդ հարցում մեր երկրում առկա վիճակը, ձեռնարկված քայլերը: Պատգամավորի համոզմամբ՝ 44-օրյա պատերազմը մեզ կանգնեցրեց այլ իրողության առջև. եթե նախկինում որոշ գերատեսչությունների կողմից օրենքի ընդունումը համարվում էր ժամանակավրեպ, ապա ստեղծված իրավիճակում նման իրավական ակտի ընդունումն անհրաժեշտություն է: Նշվել է, որ խնդրին միջանկյալ լուծումներ են տրվել օրենսդրական փոփոխությունների, Կառավարության կողմից իրականացվող սոցիալական ծրագրերի տեսքով, սակայն ամբողջական և համակողմանի կարգավորում է անհրաժեշտ:
Անդրադարձ է կատարվել Կարմիր խաչի միջազգային կոմիտեի մոդելային օրենքին, որը կիրառվել է մի շարք երկրներում:
«Մենք հույս հայտնեցինք, որ այն փորձը և մոտեցումները, որոնք որդեգրվել են այդ երկրներում, հնարավոր կլինի կիրառել նաև Հայաստանում»,- ասել է Բաղդասարյանը:
Քննարկվել են մոդելային օրենքի այն տարբերակները և մոտեցումները, որոնք կարող են համահունչ լինել ՀՀ օրենսդրությանը: Երկուստեք կարևորվել է անհետ կորած անձանց իրավական պաշտպանության ամրապնդմանն ուղղված քայլերի իրականացումը:
