03.03.2026 | 17:49
Նրանք ուզում են բանակցել, ես ասացի՝ «շատ ուշ է». Թրամփը՝ Իրանի մասին
Մահացել է Արկադի Տեր-Թադևոսյանը` Կոմանդոսը
Հասարակություն
31.03.2021 | 15:22
Արցախի հերոս, գեներալ-մայոր Արկադի Տեր-Թադևոսյանը (Կոմանդոսը) մահացել է։
Տեղեկությունը Factor.am-ի հետ զրույցում հաստատեց «Էրեբունի» ԲԿ-ի մամուլի խոսնակ Շուշան Հունանյանը։
Արկադի Տեր-Թադևոսյանը ծնվել է 1939 թվականի մայիսի 22-ին Վրացական ԽՍՀ-ի մայրաքաղաք Թբիլիսիում։ Ավարտել է Բաքվի զինվորական ուսումնարանը, այնուհետև՝ Լենինգրադի տրանսպորտի և թիկունքի ռազմական ակադեմիան։ Խորհրդային բանակի կազմում ծառայել է Աֆղանստանում, Գերմանիայում, Չեխոսլովակիայում, Բելառուսում։ 1988 թվականից միացել է Արցախի ազատագրման պայքարին և ակտիվ մասնակցություն է ունեցել կամավորականների զինվորական մարզման գործում։ 1990 թվականին դարձել է «Սասունցի Դավիթ» կամավորական ջոկատի անդամ։ 1991 թվականին նշանակվել է ՀՀ պաշտպանության կոմիտեի արտազինվորական պատրաստության բաժնի պետ։
1991 թվականի հոկտեմբերի 30-ին Արցախի նորաստեղծ ինքնապաշտպանական ուժերը Տեր-Թադևոսյանի հրամանատարությամբ իրականացված ռազմագործողության շնորհիվ ազատագրեցին ռազմավարական մեծ կարևորություն ունեցող Հադրութի շրջանի Տող գյուղը։ 1992 թվականի մայիսին ակտիվ մասնակցություն է ունեցել Շուշի քաղաքի ազատագրման ռազմագործողության նախապատրաստման աշխատանքներին։
Հիշեցնենք՝ օրերս տեղեկություններ տարածվեցին, որ Արկադի Տեր-Թադևոսյանը ծանր վիճակով տեղափոխվել է «Էրեբունի» բժշկական կենտրոն։
