ՍԴ հակապետական որոշման պատասխանատուն իշխանությունն է. ինքն է ձևավորել ՍԴ կազմի մեծ մասը. Խուրշուդյան․ ՏԵՍԱՆՅՈՒԹ

Սահմանադրական դատարանի այս հակապետական որոշման համար պատասխանատուն գործող իշխանություններն են, քանի որ իրենք են ձևավորել ՍԴ մեծամասնությունը: Այս մասին այսօր հրավիրված քննարկման ժամանակ նշեց «Ազատ քաղաքացի քաղաքացիական նախաձեռնությունների աջակցման կենտրոն» ՀԿ նախագահ Հովսեփ Խուրշուդյանը։

«Այսօր բարձրաստիճան պաշտոնյաներից մեկը հայտարարել է, որ ՍԴ-ն այս որոշումը կայացնելով՝ կատարել է պատվեր, սա նշանակում է, որ կա՛մ իշխանությունն է իջեցրել այդ պատվերը, որովհետև իրենք մեծամասնություն են ձևավորել ՍԴ-ում, կա՛մ իրենք չեն տիրապետում այն մարդկանց վարքագծին, որոնք հայտնվել են ՍԴ-ում, այսինքն՝ չեն ապահովել այնպիսի մարդկանց նշանակումը, որոնք կհետևեին օրենքին, ոչ թե կկատարեին պատվեր՝ կապ չունի ում պատվերը: Տվյալ դեպքում իշխանությունը ստորագրում է իր ձախողման տակ:

ՍԴ-ի այդ որոշումը ոչ միայն հակապետական է, այլ ապօրինի, որովհետև շահերի բախում ունեցող դատավորներն իրավասու չէին քննել և քվեարկել նման որոշման համար։

Պետք է փաստենք, որ ՀՀ-ում տեղի չի ունեցել հեղափոխություն, քանի դեռ դատական իշխանությունում չկան էական փոփոխություններ:

Այս դատական համակարգը ձևավորվել է քսան տարի։ Դատավորների մեծամասնությունը ոչ թե արդարադատություն է իրականացնում, այլ իր շահերի առաջմղումը՝ փող աշխատելով և դատական իշխանությունը պահելով։ Այդ կաստան երկար սպասում է մի հարմար առիթի՝ ժողովրդի իրավունքի դեմ նման հարձակում գործելու համար»,- նշեց Խուրշուդյանը:

Մանրամասները՝ տեսանյութում: