16.12.2025 | 16:30
Փոշի, կեղտ, չկառուցված․ Խաչատուր Սուքիասյանը՝ Կենտրոնի մասին․ ՏԵՍԱՆՅՈՒԹ
Փորձագետներն առաջարկում են հեռահաղորդակցության եւ սոցիալական ցանցերի օպերատորներին պայմանագրերում ամրագրել ատելության խոսքի վերաբերյալ դրույթ
Քաղաքականություն
30.03.2021 | 18:51
Մարտի 30-ին Անի Սամսոնյանի նախագահությամբ տեղի ունեցավ ԱԺ մարդու իրավունքների պաշտպանության եւ հանրային հարցերի մշտական հանձնաժողովի աշխատանքային նիստը՝ «Ատելության խոսքի կարգավորումը ՀՀ օրենսդրությունում» խորագրով:
Քննարկմանը մասնակցեցին համացանցային տիրույթի կարգավորմամբ եւ կառավարմամբ զբաղվող անձինք, փորձագետներ, հասարակական կազմակերպությունների ներկայացուցիչներ:
Հանձնաժողովի պատվերով համացանցային տիրույթում ատելության խոսքի դեմ պայքարի կարգավորման ուսումնասիրություններ են կատարել փորձագետներ Արա Ղազարյանն ու Դավիթ Ասատրյանը: Զեկույցը պատրաստվել է ՄԱԿ-ի Զարգացման ծրագրի «Նոր Հայաստան՝ ժամանակակից խորհրդարան» ծրագրի շրջանակում:
Հանձնաժողովի նախագահի տեղակալ Անի Սամսոնյանը նշեց, որ սա թեմայի վերաբերյալ երրորդ քննարկումն է: Նախորդ անգամ ներկայացվել են փորձագետների զեկույց-առաջարկները եւ քննարկվել վիրտուալ տիրույթի ինքնակարգավորման հնարավորությունները:
Փորձագետներն առաջարկում են հեռահաղորդակցության եւ սոցիալական ցանցերի օպերատորներին իրենց պայմանագրերում ամրագրել ատելության խոսքի վերաբերյալ դրույթ, ինչը պարտավորություն կստեղծի օգտատերերի մոտ՝ հետեւելու սեփական վարքագծին: Դա կզարգացնի նաեւ մեդիագրագիտությունը:
Բարձր տեխնոլոգիական արդյունաբերության նախարարության ներկայացուցչի համար առաջարկն ընդունելի է: Նա նաեւ կարծում է, որ ինֆորմատիկա առարկայով կարելի է մեդիագրագիտություն ուսանել:
Ոլորտի մասնագետների կարծիքով՝ նշյալ առաջարկը խնդիրներ կստեղծի օպերատորների համար, քանի որ վերջիններս պատասխանատու չեն բովանդակության համար. նրանք ապահովում են միայն անխափան կապը:
Փորձագետներն ընդգծեցին, որ գործող պայմանագրերում առկա է ցանցային էթիկետ դրույթը, որը կարելի է վերաձեւակերպել: Գործող դրույթի վերաձեւակերպմանը համաձայնություն տվեցին ոլորտի մասնագետներն այն պայմանով, որ օպերատորների վրա այլ պատասխանատվություն չի դրվելու եւ ապագայում մշտադիտարկում չեն իրականացնելու: Դրույթը պայմանագրում ամրագրվելու է միայն որպես տեղեկատվություն:
