Ռուսական զորքերը հարվածել են Խարկովի բազմահարկ բնակելի շենքին․ տուժածներ կան

Հոկտեմբերի 12-ի առավոտյան ռուսական զորքերն անօդաչու թռչող սարքով հարվածել են Խարկովի Կիևյան շրջանում գտնվող բազմահարկ բնակելի շենքին։ Տուժել է հինգ մարդ, հայտնել է քաղաքապետ Իգոր Տերեխովը, գրում է  Current time-ը։

Նրա խոսքով՝ հարձակման հետևանքով շենքի մուտքերից մեկում ավերվել են 7-ից 9-րդ հարկերի բնակարանները, դեպքի վայրում հրդեհ է բռնկվել։ Որոնողա-փրկարարական աշխատանքները շարունակվում են։

Խարկովի մարզային ռազմական վարչակազմի ղեկավար Օլեգ Սինեգուբովը հայտնել է, որ ռուսական մեկ այլ անօդաչու թռչող սարք հարվածել է սպորտային հաստատության շենքին։

Օդեսայի մարզի հարավում էլ վնասվել են «Նովա Պոշտա» փոստային օպերատորի տարածքները։ Մարզային ռազմական վարչակազմի ղեկավար Օլեգ Կիպերի խոսքով՝ տեղում աշխատանքներ են տարվում հարձակման հետևանքները վերացնելու ուղղությամբ։ Տուժածներ չկան։

Դնեպրոպետրովսկի մարզի Պավլոգրադի շրջանում ռուսական հարվածի հետևանքով ձեռնարկության տարածքում հրդեհ է բռնկվել։ Ուկրաինայի արտակարգ իրավիճակների պետական ծառայությունից հայտնել են, որ հրդեհը լայնածավալ է եղել, սակայն հաջողվել է այն մարել։ Չի նշվում, թե ինչ ձեռնարկություն է վնասվել։

Հոկտեմբերի լույս 12-ի գիշերը Ռուսաստանն Ուկրաինայի ուղղությամբ արձակել է Х-59 տիպի մեկ հրթիռ և 121 անօդաչու թռչող սարք։ Ուկրաինայի զինված ուժերի ռազմաօդային ուժերի հաղորդմամբ՝ ուկրաինական ուժերը խոցել են 89 ԱԹՍ։

Ռուսաստանի ՊՆ-ն էլ հայտնել է, որ հոկտեմբերի լույս 12-ի գիշերը շարունակել են հարվածներն Ուկրաինայի նավահանգստային ենթակառուցվածքների օբյեկտներին և նավերին։ Գերատեսչության պնդմամբ՝ հարված է հասցվել «ռազմական նշանակության բեռով» Օդեսա ուղևորվող բեռնանավին։