Որևէ նախարար ժեկի պետ չէ և պիտի պատասխանատվություն կրի ասածների համար. Արկադի Խաչատրյանը՝ Քերոբյանին. ՏԵՍԱՆՅՈՒԹ

Պաշտոնատար անձինքն պետք է լինեն շատ ավելի պատասխանատու, նրանց խոսքը պետք է լինի հիմնավորված, և դրա համար պետք է կրեն քաղաքական պատասխանատվություն: Այս մասին Factor.am-ի հետ զրույցում նշեց «Լուսավոր Հայաստան» խմբակցության պատգամավոր Արկադի Խաչատրյանը:

«Ինչ վերաբերում է Էկոնոմիկայի նախարարի կանխատեսումներին, այդ թվում՝ 10 տոկոս տնտեսական աճի, տնտեսության վերականգնված լինելու վերաբերյալ, ապա որևէ նախարար ԺԷԿ-ի պետ չէ և պիտի պատասխանատվություն կրի իր ասածների համար»,- ընդգծեց Արկադի Խաչատրյանը՝ հավելելով, որ նկատի ունի նաև Քերոբյանի հայտարարությունն այն մասին, որ երկնիշ տնտեսական աճը շարունակում է մնալ որպես թիրախ:

Պատգամավորի խոսքով՝ երկարաժամկետ առումով երկնիշ տնտեսական աճը պետք է լինի թիրախ, բայց պետք է հասկանալ, որ դրա համար օբյեկտիվ պայմաններ պետք է ստեղծել. «Այսինքն՝ կապիտալ ծախսեր, ներդրումների ներգրավում և պոտենցիալի վերականգնում պետք է իրականացնել, իսկ դրա համար այսօր ինչ լուրջ քայլեր էլ ձեռնարկվեն, ժամանակ է պետք, որ դրանք արտացոլվեն տնտեսության ցուցանիշների մեջ: Նախընտրական փուլում այսպիսի հայտարարությունները կարող են կեղծ սպասումներ ձևավորել հանրության շրջանում, իսկ դա ընդունելի չէ»:

Խաչատրյանի դիտարկմամբ՝ անցած տարվա ընթացքում տնտեսական աճի պոտենցիալն այնքան էր մաշված, որ միանգամից այդպիսի աճ ապահովելը, հաշվի առնելով նաև պրոֆեսիոնալ գնահատականները, գրեթե անհնար է: «Այն ժամանակ ասում էին, որ դա կա՛մ ռոմանտիկ հայտարարություն է, կա՛մ անտեղյակություն:

Էկոնոմիկայի նախարարությունում աշխատում են նաև շատ պրոֆեսիոնալ և հայրենասեր մարդիկ, բայց պաշտոնյաների խոսքը պետք է լինի հիմնավորված»,- նշեց ԼՀԿ պատգամավորը: