09.12.2025 | 12:41
Ռաբիոյի տպավորիչ գոլն ու «Միլանի» «քամբեքը»․ ՏԵՍԱՆՅՈՒԹ
Թուրք-ադրբեջանական զորավարժությունները տարածաշրջանում կայունության ու անվտանգության համար ռիսկեր չեն ստեղծում․ Զախարովա
Քաղաքականություն
12.03.2021 | 13:55
Ամենշաբաթյա ճեպազրույցի ժամանակ ՌԴ ԱԳՆ խոսնակ Մարիա Զախարովան անդրադարձել է Ադրբեջանի ու Թուրքիայի համատեղ զորավարժություններին՝ նշելով, որ դրանք կրում են պլանային բնույթ։
«Մեր ունեցած տեղեկությունների համաձայն՝ վերոնշյալ զորավարժությունները կրում են պլանային բնույթ, ուղղված են զորքերի պատրաստվածության բարձրացմանն ու տարածաշրջանում կայունության ու անվտանգության համար ռիսկեր չեն ստեղծում»,- հայտարարել է Զախարովան։
Անդրադառնալով Ալիևի կողմից «Զանգեզուրն Ադրբեջանին պատկանելու» վերաբերյալ արված հայտարարություններին՝ Զախարովան հայտարարել է, որ ՌԴ-ն ընդհանուր առմամբ փաստում է այս հարցում Հայաստանի ու Ադրբեջանի կողմից իրականացվող կառուցողական քայլերը։
«Մենք ակնկալում ենք, որ նման կառուցողական մոտեցումը կգերիշխի ինչպես պաշտոնական մեկնաբանություններում, այնպես էլ Հայաստանի ու Ադրբեջանի ԶԼՄ-ներում»,- հավելել է Զախարովան։
Զախարովան անդրադարձել է նաև Լեռնային Ղարաբաղում Հայրենական մեծ պատերազմի հերոսներին նվիրված հուշակոթողների նկատմամբ վանդալիզմի դրսևորումներին:
«Անթույլատրելի և անբարոյական ենք համարում Հայրենական մեծ պատերազմի տարիներին նացիզմի դեմ հերոսական պայքար մղած անձանց հիշատակի նկատմամբ ցանկացած ոտնձգություն»,- ասել է Զախարովան՝ հույս հայտնելով ադրբեջանական իշխանությունները կձեռնարկեն անհրաժեշտ քայլերը իրավիճակը շտկելու համար:
Տաթև Ֆռանգյան
